रविलाई ज्ञानेन्द्रको सुझाव- काम गर्न सकिएन भन्नुस्, झुटो नबोल्नुस्

काठमाडौं । राप्रपाका प्रमुख सचेतक ज्ञानेन्द्र शाहीले गृहमन्त्री रवि लामिछानेले जीबी राई पक्राउ नगरी बिदा हुन लागेको बताएका छन् ।

शुक्रबारको संसद बैठकमा बोल्दै शाहीले लामिछानेलाई नै सम्बोधन गर्दै भने, ‘तपाईंले सुशासनको कुरा गर्नुभयो तर तपाईंको अभिन्न मित्र जीबी राई पक्राउ नगरेरै बिदा हुनुभयो । अझै समय छ पक्राउ गर्नुस् ।’

उनले पूर्वउपसभामुख निर्दोष रहेको, पूर्वराष्ट्रपतिका छोरा सुन प्रकरणमा अडियो आउँदा पनि निर्दोष भएको सीआईबीको दाबीलगायतको उदाहरण दिँदै कसरी सुशासन भएको भन्न सकिन्छ भन्दै प्रश्न गरे ।

उनले लामिछानेलाई झुटो नबोल्न आग्रह गरे । ‘एउटा आशा र अभिलाषा हुन्छ’, उनले भने, ‘तर झुटो नबोल्नुस् । योे रोष्ट्रम झुटका लागि होइन । झुटका लागि प्रयोग नगरौं सत्य बोल्नुस् ।’

शाहीले लामिछानेलाई काम गर्न नसकेको, नपाइएको भनेर स्वीकार्न पनि सुझाए ।

‘काम गर्न पाइएन, सकिएन भन्नुस्’, शाहीले भने ।

त्यस्तै, गृहमन्त्री लामिछानेले फाइल खोल्न थालेकाले सरकार बदल्ने खेल सुरु भएको भन्नेमा पनि शाहीले जवाफ दिए । वेचन झालाई ब्राण्डिङ गरिएको प्रति पनि आपत्ति जनाए । ‘के बेचन झा भन्नुहुन्छ, को हो उहाँ ? पूर्व उपप्रधानमन्त्री, सांसद टोपबहादुर रायमाझीभन्दा ठूलो हो ?’, उनले भने, ‘उहाँलाई पक्राउ गर्दा सरकार नढल्ने जाबो वेचेनेका वैचन गर्दा सरकार ढल्ने ? गलत भाष्य निर्माण नगरौं न ।’

ठूला नेताहरुमा लेनदेन नमिलेर सरकार ढलेको शाहीको तर्क छ ।