एकीकृत समाजवादी र माओवादीसहित प्रतिपक्षको अवरोधपछि मधेश प्रदेशसभा स्थगित

जनकपुरधाम । मधेश प्रदेशसभा बैठकमा नेकपा एकीकृत समाजवादी र नेकपा माओवादी केन्द्रसहितका प्रतिपक्षी दलले अवरोध गरेका छन् ।

सभामुख रामचन्द्र मण्डलले प्रदेशसभा बैठक सुरु गरेलगत्तै नेकपा एसका सांसद रत्नेश्वरलाल गोइतले आफूहरुको माग सम्बोधन नभएको भन्दै तत्काल बैठक सञ्चालन नगर्न आग्रह गरे ।

उनले प्रस्तावित रेडबुक संशोधनको विषय विनियोजन विधेयकमा समावेश नगरिएको र ६४ वटै निर्वाचन क्षेत्रमा सन्तुलित बजेटको माग पनि सम्बोधन नभएको भन्दै आक्रोश पोखे ।

प्रदेश सांसद गोइतले आफूहरुको माग सम्बोधन गरेरमात्र बैठक सञ्चालन गर्न माग राखेपछि सभामुखले १० मिनेटका लागि बैठक स्थगित गरेका छन् ।

प्रदेशसभाबाट अझै आगामी आर्थिक वर्षको बजेट र विनियोजन विधेयक पारित हुन सकेको छैन । प्रतिपक्षी दलले बजेटमा गडबड गरिएको विषयमा छानबिन हुनुपर्ने र सबै क्षेत्रमा बजेट सन्तुलित हुनुपर्ने माग उठाउँदै आएका छन् ।