एमाले वरिष्ठ उपाध्यक्ष पोखरेल कतारमा, प्रवासी नेपाली मञ्चको कार्यक्रममा सम्बोधन

दोहा । नेकपा एमालेका वरिष्ठ उपाध्यक्ष ईश्वर पोखरेलले प्रवासी नेपाली मञ्च कतारलाई सम्बोधन गरेका छन् ।

सातौँ अधिवेशनको पूर्वसन्ध्यामा सम्पन्न बैठकलाई सम्बोधन गर्दै पोखरेलले एमालेको संगठन विश्वको ३७ ओटा देशमा फैलिएको बताए । यो देशभित्रको कमिटीजस्तो सहज नरहेको पोखरेलले बताए ।

उपाध्यक्ष पोखरेलले प्रवासमा संगठन निर्माण चुनौतीपूर्ण रहेको बताए छन् ।

पोखरेलले भने ‘हाम्रो पार्टीमा नीति र नेतृत्वमा विवाद छैन । नेतृत्वमा छलफल गर्नुहोस् पार्टी निर्माणमा जोड दिनुस् । प्रतिकूल देशमा बसेर संगठन निर्माण गर्दा सर्वसम्मतिमा गर्नुस् । नेताहरू रेफ्रीको भूमिकामा रहनुपर्नेमा आफैं गोल हान्न खोज्दा समस्या हुन्छ ।’

देशमा राजनीतिक स्थायित्व नभएकाले स्थायित्व कायम गर्न एमालेले मिसन ०८४ को नीतिअघि सारिएको पोखरेलले बताए । त्यसको लागि १५ हजार प्रवास कमिटी सदस्य बनाउन जरुरी रहेको बताए ।

मञ्चका संयोजक अफ्सर खानको अध्यक्षतामा बसेको बैठकमा प्रवासी नेपाली मञ्च अन्तर्राष्ट्रिय कमिटी अध्यक्ष संजय थापा, एमाले कोशी प्रदेश अध्यक्ष घनश्याम खतिवडा, मञ्चका मध्यपूर्व संयोजक प्रकाश कोइरालालगायतले सम्बोधन गरेका थिए ।

प्रवास मञ्चको अधिवेशन दुई दुई वर्षमा हुने गरेको छ । प्रवासी मञ्चमध्ये कतार एमालेको बलियो संगठन रहेको क्षेत्र हो ।