‘सक्किगोनी’ को टिमले चलचित्र ‘लाज शरणम्’ बनाउने

काठमाडौं। ‘सक्किगोनि’ टिमका निर्देशक तथा कलाकार कुमार कट्टेलको जन्मदिनको अवसर पारेर चलचित्र ‘लाज शरणम्’को औपचारिक निर्माण घोषणा गरिएको छ । शुक्रबार राजधानीमा आयोजित एक कार्यक्रमकाबीच चलचित्रको निर्माण घोषणा गरिएको हो ।

चलचित्रको निर्माण घोषणा कार्यक्रममा बरिष्ठ हाँस्य कलाकर हरिवंश आचार्य, अभिनेत्री तथा निर्देशक दीपाश्री निरौला, निर्देशक समाजका अध्यक्ष जनकदीप पराजुली, नेपाल चलचित्र संघका अध्यक्ष नरेन्द्र महर्जन, निर्देशक प्रदीप भट्टराई, केदार घिमिरे, निर्मल शर्मा, दीपक आचार्य, सोम धिताल, विशाल भण्डारी, ओम प्रकाश अग्रवाल र वितरक मनोज राठी लगायतको उपस्थिति रहेको थियो ।कार्यक्रममा मिडिया हबका सञ्चालक सोम धिताललाई कदर-पत्र र दोसल्ला सहित सम्मान गरिएको थियो । चलचित्रको मार्केटिङ ब्रान्डिङ पाटर्नरको रुपमा एडी रिलिजसँग कार्यक्रममै सम्झौता गरिएको हो ।

कुमार कट्टेलको लेखन तथा निर्देशन रहने चलचित्रमा नवीन श्रेष्ठ निर्माता र राम नरेश शाह सहनिर्माताको रुपमा रहनेछन। सुदीप बरालको छायांकन रहने चलचित्रमा अर्जुन घिमिरे (पाँडे), सागर लम्साल (बले) कमलमणी नेपाल (खुपीका बाउ), माला लिम्बु, विजय बराल र मुकुन्द श्रेष्ठको मुख्य भुमिका रहनेछ । यसै चलचित्रबाट मुकुन्द श्रेष्ठ १२ वर्षपछि नेपाली सिनेमामा कमव्याक गर्दैछन् । चलचित्रमा सक्किगोनि टिमबाट को-को कलाकार रहने तथा अन्य कलाकारहरु को-को हुने भन्ने जानकारी विस्तारै सार्वजनिक गरिने निर्माण टिमको भनाई छ।

यही वर्षको फागुन १४ अर्थात् महाशिवरात्रीको अवसर पारेर चलचित्र प्रदर्शनमा ल्याउने तयारी निर्माण टिमको छ । आयोजित कार्यक्रममा चलचित्रको घोषणासंगै कार्यक्रममा लेखक तथा निर्देशक कुमार कट्टेलको जन्मदिन समेत सेलिब्रेसन गरिएको थियो ।