अस्वस्थ प्रदेश सांसद चौधरी भेट्न भक्तपुर पुगे प्रदेश प्रमुख मियाँ

कैलाली । सुदूरपश्चिम प्रदेश प्रमुख नजिर मियाँले प्रदेशसभा सदस्य लक्ष्मणकिशोर चौधरीलाई भेटेर शीघ्र स्वास्थ्य लाभको कामना गरेका छन् ।

मिर्गौलामा समस्या बल्झिएपछि सांसद चौधरी लामो समयदेखि भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा उपचाररत छन् । आज प्रदेश प्रमुख मियाँले उनको स्वास्थ्य अवस्थाबारे बुझ्दै स्वास्थ्य लाभको कामना गरेका हुन् ।

नागरिक उन्मुक्ति पार्टीका सांसद चौधरी सुदूरपश्चिम प्रदेशको सामाजिक विकासमन्त्री भइसकेका छन् । पार्टी केन्द्रीय उपाध्यक्ष रहेका उनी नाउपा संसदीय दलका प्रमुख सचेतक पनि हुन् ।

प्रदेश प्रमुखसँगको भेटका उनले उपचारमा आर्थिक समस्या उत्पन्न हुन थालेको सुनाएका छन् । प्रदेश प्रमुख मियाँले उपचारमा समस्या आउन नदिने भन्दै सांसद चौधरीलाई उपचारमा केन्द्रित हुन आग्रह गरे ।

चौधरीले एक दशक पहिले मिर्गौला प्रत्यारोपण गरेका थिए ।