विद्यालयको नामलाई लिएर कुप्रचार गरिएपछि गजेडी माविले दियो यस्तो चेतावनी

रुपन्देही । रुपन्देहीको कन्चन गाउँपालिका वडा नं २ स्थित गजेडी माध्यमिक विद्यालयले आफ्नो विद्यालयको नाम जोडेर सामाजिक सन्जालमा गलत सन्देश दिने गरी कुप्रचार गरिएकोमा आपत्ति जनाउँदै यस्तो गलत कामलाई निरन्तरता दिए कारबाही गर्ने चेतावदी दिएको छ ।

विद्यालयको बदनाम हुनेगरी सामाजिक सन्जालमा अन्य विद्यालयका विद्यार्थीले चुरोट पिएको, गाजा तानेको फोटाहरु राखेर अभिभावक तथा विद्यार्थी एवम् आम शुभेच्छुकहरुलाई गलत सन्देश दिइएको प्राचार्य रेशमा जोशी वाग्लेले बताइन् ।

बालकक्षादेखि १२ कक्षासम्म अध्ययन हुने यो विद्यालयमा भर्ना हुने समयमा यस्ता खालका दुस्पचार हुने उनको भनाइ छ ।

‘विद्यालयको नाम यहाँको ऐतिहासिक विषयलाई जोडेर राखिएको हो, त्यसैका आधारमा पहिले गाविसको नाम थियो, अनि विद्यालयको नाममा गलत सन्देश दिनेगरी यस्तो काम गर्नेलाई साइबर कानुनबाट कारबाहीका लागि आमीले प्रहरी तथा प्रशासनलाई पनि आग्रह गरेका छौं, सबै विद्यार्थी तथा अभिभावकलाई पनि अनुरोध गरेका छौं’ उनले भनिन् ।

सामाजिक सन्जालमा अन्यत्रका विद्यार्थीले चुरोट तानेको, गाँजा तानेको फोटा खोजेर, विद्यालयको बोर्डसहितको फोटा राखेर नामअनुसारको काम, यस्तो छ विद्यालयको नामलगायतका विषय राखेर पोष्ट भइरहेपछि विद्यालय प्रशासनले आपत्ति जनाउँदै कारबाहीको माग गरेको हो ।

विद्यालयले सार्वजनिक रुपमै विज्ञप्ती जारी गरेर यस्तो अनर्गल प्रचारको पछि नलाग्न र विद्यालयका नामको ऐतिहासिकता बुझ्नका लागि आग्रह गरेको छ ।