इरानविरुद्ध पश्चिम एसियामा नेटो जस्तै गठबन्धन बनाउन इजरायली प्रस्ताव

काठमाडौँ । इजरायलले पश्चिम एसियामा नेटो जस्तै सैन्य गठबन्धन बनाउन प्रस्ताव गरेको छ । इरानकोविरुद्धमा यस्तो गठबन्धन बन्नुपर्ने इजरायलको प्रस्ताव छ ।

इजरायली प्रधानमन्त्री बेन्जामिन नेतान्याहुले अमेरिकी संयुक्त सदनमा बोल्दै बुधबार यस्तो प्रस्ताव गरेका हुन् । उनले अब्राहम गठबन्धनको नाममा यस्तो सैन्य गठबन्धन बनाउन सकिने प्रस्ताव गरेका छन् ।

अमेरिकी संयुक्त सदनमा चौथोपटक सम्बोधन गर्दै नेतान्याहुले यस्तो बताएका हुन् । उनले भनेका छन्, ‘अमेरिकाले सोभियत जोखिमलाई सम्बोधन गर्न यूरोपमा नेटो गठबन्धन बनायो । यस्तै गठबन्धन इरान बिरुद्ध पश्चिम एसियामा बनाउन सकिन्छ ।’

गत अप्रिल १४ मा बेलायत तथा अमेरिकाले इरानी हमला निस्तेज पार्न संयुक्त पहल गरेको भन्दै उनले अब्राहम गठबन्धनको झल्को त्यहिबेला आएको बताएका छन् ।