प्रतिपक्षमा हुत्तिएको माओवादी ‘ठूलो रुपान्तरण’ को प्रक्रियामा जाने (भिडिओ)

काठमाडौं । कांग्रेस-एमालेको गठबन्धनसँगै प्रतिपक्षमा हुत्तिएको माओवादीले ‘ठूलो रुपान्तरण’ को प्रक्रियामा जाने बताएको छ ।

आइतबार केन्द्रीय कार्यालय पेरिसडाँडामा बसेको पदाधिकारी बैठकले ठूलो रुपान्तरणको प्रक्रियामा जाने निर्णय गरेको हो । बैठकपछि सञ्चाकरर्मीसँग प्रवक्ता अग्निप्रसाद सापकोटाले वर्तमान परिस्थिति र पार्टी निर्माणसम्बन्धी छलफल भइरहेको बताए ।

बैठकमा आज जनार्दन शर्मा, गणेश साह, हितमान शाक्य, गिरिराजमणि पोखरेल, श्रीराम ढकालले आफ्ना धारणा राखेका थिए ।

माओवादी नेतृत्वको सरकारले गरेका राम्रा कामलाई लिएर जनतामाझ जानुपर्नेमा नेताहरूले जोड दिएको उनले सुनाए । जनतामा गएर राष्ट्रियता, जनजीविकाका सवालहरूलाई थप बलियो बनाउनुपर्ने सुझाव आएको पनि सापकोटाले जानकारी दिए ।

‘सरकारमा बसेर सुशासन, सामाजिक न्याय र समृद्धिको पक्षमा भएको कुराको सामूहिक स्वामित्व लिनुपर्ने र कमी कमजोरी पनि गम्भीर समीक्षा गर्नुपर्नेमा अधिकांशको जोड रहेको छ’, उनले भने ।

सापकोटाले थपे, ‘वर्तमान परिस्थिति र पार्टी निर्माणसम्बन्धी नै छलफल भइरहेको छ । आज ५ जना कमरेडहरूले आफ्नो भनाइ राख्नुभयो । राष्ट्रिय, अन्तर्राष्ट्रिय परिस्थितिको बारेमा, विश्व दृष्टिकोणका बारेमा सीमारहित छलफल छ । जसलाई जति समय आवश्यक छ, त्यसैअनुसार समय दिइएको छ । परिस्थिति जटिल र पेचिलो छ । हामीले एक खालका कार्यक्रम बनाएर जनतामा जानुपर्छ । हामी एउटा ठूलो रुपान्तरणको प्रक्रियामा छौँ ।’

पार्टी एक पटक पुनः जनतामा जाने गरी अभियान सञ्चालन गर्ने उनले सुनाए ।

पदाधिकारी बैठक सकिएपछि स्थायी कमिटी र केन्द्रीय कमिटी बसेर आवश्यक निष्कर्ष निकाल्ने प्रवक्ता सापकोटाको भनाइ छ ।