नागार्जुन जङ्गलमा लुटपाट, गरगहनासहित एक जना पक्राउ

काठमाडौं । खुकुरी देखाई लुटपाटमा संलग्न रहेको अभियोगमा मकवानपुर पदमपोखरी घर भएका ५२ वर्षीय धनबहादुर स्याङ्ताङलाई प्रहरीले पक्राउ गरेको छ ।

नागर्जुन नगरपालिका ७ बिन्दवासिनी मन्दिर नजिकैको जंगलमा ३ जना अपरिचित व्यक्तिले धारिलो हतियार देखाई लुटपाट गरेका थिए । जिल्ला प्रहरी परिसर काठमाडौंबाट खटिएको प्रहरीले खोजी तथा अनुसन्धान गर्ने क्रममा लुटपाट गर्ने समूहका नाइके भएको दाबीसहित धनबहादुरलाई पक्राउ गरेको हो ।

उनको साथबाट सुनको औंठी ४ थान, सुनको सिक्री १ थान, सुनको लकेट १ थान, सुनको ब्रासलेट २ थान, कानमा लगाउने सुनको रिङ २ थान, सुनको सिक्रीको टुक्रा १ थान, चाँदीको ब्रासलेट १ थान, खुकुरी २ थान र नगद १३ हजार ४०० रूपैयाँसमेत प्रहरीले बरामद गरेको छ ।

यस सम्बन्धमा प्रहरीले आवश्यक अनुसन्धान गरिरहेको छ ।