खगेन्द्र र निश्चलपछि ‘घर नम्बर २’मा आर्यनको प्रवेश

काठमाडौं । फिल्म ‘के घर के डेरा: घर नम्बर २’ मा नायक आर्यन सिग्देलको प्रवेश भएको छ । फिल्मको निर्माण पक्ष र आर्यनबीच लिखित सम्झौता भए पनि उनको भूमिकाको बारेमा केही खुलाइएको छैन ।

दीपेन्द्र के खनालको निर्देशनमा बन्न लागेको यो फिल्मको छायांकन साउनको २५ गतेबाट सुरु हुँदैछ । फिल्ममा यसअघि नै खगेन्द्र लामिछाने, निश्चल बस्नेत फाइनल भइसकेका छन् । निर्माण पक्षका अनुसार, अब फिल्मका लागि मुख्य दुई नायिका फाइनल गर्न बाँकी छ ।

ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको यो फिल्मको कथा बुद्धि सागरले लेखिरहेका छन् । फिल्ममा शरद श्रेष्ठ, किरण महर्जन र राजिव श्रेष्ठको लगानी छ । फिल्मका कार्यकारी निर्माता युवराज कार्की हुन् ।

फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनीले वितरण गर्ने पक्का भइसकेको छ ।सामाजिक कथावस्तुलाई रोचक तरिकाले फिल्ममा प्रस्तुत गर्ने निर्देशक खनालले जानकारी दिए । फिल्मलाई यही वर्ष रिलिज गर्ने तयारी निर्माण पक्षको छ ।