कोटिहोममा पुगेर कृष्ण कँडेलसँग नाचे पल शाह, एक लाख दान गरेर हिँडे

काठमाडौं । पशुपतिनाथ मन्दिरमा आयोजित कोटिहोममा कलाकारहरुको पनि राम्रै आकर्षण देख्न सकिन्छ । सोमबार अभिनेता पल शाह आफ्नी आमा लिएर कोटिहोममा पुगे ।

कथावाचिका देवी प्रतिभाको अन्तिम दिनको प्रस्तुतिमा पल शाह पुगेका हुन् । उनले मञ्चबाट सम्बोधन गर्नुका साथै नाचगान गर्दै रमाइलो गरे । शाहलाई इन्द्रेणीका कृष्ण कँडेलले नाच्न साथ दिएका थिए ।

पल शाहले कोटिहोममा भारी रकम दान पनि गरेका छन् । उद्घोषकले बताएअनुसार उनले १ लाख एक हजार १११ रुपैयाँ बुझाएका हुन् । उक्त रकम एक जना बच्चाको अभिभावकत्वका लागि शाहले प्रदान गरेको कार्यक्रममा जानकारी गराइयो । उक्त दानपश्चात उद्घोषकले पनि पल शाहको गुणगान गाउन कुनै कसर बाँकी राखेनन् ।

कार्यक्रममा इन्द्रेणीका सञ्चालक कँडेलले पनि लामै स्पिच दिए । उनले इन्द्रेणी हेर्नेहरुले हात उठाउनुस् भन्दै आफ्नो कार्यक्रमको प्रचार गर्न पनि भ्याए ।

देवी प्रतिभाको बचाउमा पनि उत्रिए कँडेल । नेपालकी छोरी प्रतिभाले ठूलो रकम लगेको भनेर दुष्प्रचार गरिएको उनले बताए ।

‘मैले हिजोअस्ति कहाँ कहाँ सुनेँ, देवी प्रतिभाले यति पैसा लैजाने, यसो गर्ने, उसो गर्ने भनेर । यही नेपालको काभ्रेमा जन्मेकी छोरी, सबैभन्दा बढी पहिरो जाने सिन्धुपाल्चोकको छिमेकी जिल्ला, सबैभन्दा विपन्न ठाउँको मान्छेले यत्रो पैसा लैजानुहोला त ?’ उनले भनिन् ।

आजै कोटिहोममा अभिनेता निखिल उप्रेतीको पनि उपस्थिति रह्यो । उनले छोटो प्रवचनसमेत दिएका थिए ।