बाउन्सर टोली लिएर हिँडेकोबारे देवी प्रतिभाको जवाफ- नेपालकी छोरीको ‘जलवा’ मा गौरव गर्नुस्

काठमाडौं । पशुपति मन्दिर परिसरमा आयोजित ‘कोटी होम’ मा सहभागी हुन आएकी देवी प्रतिभा अहिले ‘टक अफ द टाउन’ बनिरहेकी छन् । हिजो उनले आफ्नो अन्तिम प्रवचन सकेर आज भारत प्रस्थान गरिन् ।

हिजोको प्रवचनपछि आयोजकले देवी प्रतिभालाई युट्यूवरहरूमाझ राखिदिएका थिए । उनीमाथि उठेका प्रश्न र विवादहरूको विषयमा प्रष्ट पार्न उक्त युट्युवर सम्मेलन आयोजना गरिएको थियो । त्यसमा देवी प्रतिभाले आफूमाथि लागेका आरोपहरूबारे जवाफ दिइन् ।

देवी प्रतिभा आएसँगै सबैभन्दा बढी चर्चा भएको विषय हो, उनले आफूसँग ल्याएका ‘बाउन्सर’ हरूको झुण्ड । उनले ज्याङ्गो शरीर भएका युवकहरूलाई ‘बडीगार्ड’ का रूपमा लिएर आएकी छन् । उनी हिँडडुल गर्दामात्र होइन, ब्यासमा बसेर कथावाचन गर्दासमेत बडिगार्डले दायाँबायाँ पहरा दिइरहेका हुन्छन् । एक धार्मिक अभियन्ताको यत्रो तुजुक किन ? आफ्नै गृहभूमिमा यात्रा गर्दा उनलाई कसको डर छ ? यो विषय एक युट्यूवरले उठाए ।

जवाफमा देवी प्रतिभाले आफू जहाँ जाँदा पनि अत्यधिक भिड हुने भएकाले बडीगार्ड लैजानुपरेको तर्क गरिन् । भारतमा आफूले ६०/७० जनासम्म बडीगार्ड लिएर हिँडेको भन्दै दम्भ पनि देखाइन् ।

उनको जवाफ यस्तो छः

कथा वाचनको क्रममा म धेरै ठाउँमा पुग्छु । नेपाल, भारत र अन्य देशमा पनि । जहाँ पनि देवी प्रतिभाको कथामा एकदमै भिड हुन्छ । अहिले पशुपतिनाथमा पनि देखिरहनुभएको छ । भारतमा योभन्दा पनि डबल भिड हुने भएकाले पहिले नै सूचना गरिएको हुन्छ । म जहाँ जान्छु, त्यहाँ प्रहरी प्रशासन अलर्ट बस्छन् । यहाँ त १०/१२ जना देख्नुभयो । ६०/७० जनाको पनि रेकर्ड छ । नेपालकी छोरीको यस्तो रुतवा/जलवा देखेर गौरव गर्नुपर्ने विषय हो ।

देवी प्रतिभाले एक प्रवचनका क्रममा दिएको अभिव्यक्ति पनि अहिले सामाजिक सञ्जालमा आलोचित बनिरहेको छ । त्यसमा उनले कुनै पनि विवाहित जोडीले डिभोर्स गर्नै नहुने बताएकी थिइन् । श्रीमान जति काम नलाग्ने भए पनि श्रीमतीले ऊसित अलग हुनु नहुने धार्मिक मान्यता प्रस्तुत गरिरहँदा उनले आफूसँगै कथावाचन गर्न आएकी ‘डिभोर्सी’ राधिका दासीलाई कटाक्ष गरेकी त होइनन् भन्ने पनि धेरैको जिज्ञासा छ ।

यो प्रश्नमा भने देवी प्रतिभाले खुलेर बोल्न सकिनन् । टालटुले जवाफमात्र दिइन् ।

उनले भनिन्, ‘जहाँ नारी शक्तिको सम्मान र सेवा गरिन्छ भने त्यो ठाउँमा देवताहरू पनि भ्रमण गर्नुहुन्छ । शास्त्रले नारी शक्तिको सर्वथा सम्मान गर्नुपर्छ भनेको छ । म हरेक ठाउँमा यही नै भन्छु । कतिपय व्यक्तिको डिभोर्स हुन्छ, त्यो निजी विषय हो । तर, हाम्रो शास्त्रमा डिभोर्स भन्ने शब्द नै छैन । अहिलेको कानूनमा डिभोर्स छ, तर म यही उपदेश गर्छु कि पुरुष र नारी दुवैले एक अर्काको सम्मान गर्नुपर्छ ।