शुक्रवारदेखि जारी माओवादीको पदाधिकारी बैठकमा किन सहभागी भएनन् महरा र पौडेल ?

काठमाडौं । सरकारबाट बाहिरिएपछि नेकपा माओवादी केन्द्रको पदाधिकारी बैठक शुक्रवारदेखि जारी छ । अहिले १ बजेबाट पार्टी केन्द्रीय कार्यालय पेरिसडाँडामा बस्ने लागेको बैठकमा पदाधिकारीहरूले राखेको धारणाको जवाफ दिएर टुंग्याउने तयारी छ ।

यो बैठकले माओवादीको अबको रणनीति र कार्यक्रम तय गर्ने बताइएको छ । तर, चार दिनदेखि जारी बैठकमा उपाध्यक्ष कृष्णबहादुर महरा र सचिव देवेन्द्र पौडेल सहभागी छैनन् ।

त्यसबारेमा कार्यालयका सचिव डोरप्रसाद उपाध्यायले भने, ‘महराजीको स्वास्थ्य अवस्था राम्रो छैन। उहाँ घरमै आराम गरिराख्नुभएको छ । देवेन्द्रजी अहिले अमेरिका जानुभएको छ । त्यही भएर बैठकमा उपस्थित हुनुहुन्न ।’

उनले आजको बैठक सुरु हुने तयारी भइरहेको बताए। बैठकमा प्रचण्डले नेताहरूले उठाएको प्रश्नको जवाफ दिँदै पछिल्लो राजनीतिक स्थिति र भावी रणनीतिबारे जानकारी गराउनेछन् ।

यो बैठकपछि स्थायी कमिटी र लगत्तै केन्द्रीय कमिटीको बैठक बसेर सदन र सडकमा प्रतिपक्षको भूमिका खेल्ने माओवादीको तयारी छ।