माओवादीको निष्कर्ष- आगामी निर्वाचन एक्लै लड्ने, कम्युनिष्ट एकताको पहल नछाड्ने

काठमाडौं । नेकपा माओवादी केन्द्रले आगामी निर्वाचनमा एक्लै जानेगरी पार्टी संगठन निर्माण गर्ने निष्कर्ष निकालेको छ । पार्टी मुख्यालयमा पाँच दिनसम्म चलेको पदाधिकारी बैठकले अध्यक्ष प्रचण्डको नेतृत्वमा सरकारले गरेका राम्रा काम जनताकहाँ लिएर जाने निष्कर्ष निकालेको प्रवक्ता अग्नि सापकोटाले बताए ।

उनले भने, ‘हाम्रो सरकारले गरेको कामलाई उठाउने र भ्रष्टाचारविरोधी अभियान अगाडि बढाउन सरकारलाई दबाब दिने, आगामी निर्वाचन एक्लै लड्ने तयारी गर्ने, जसले गर्दा हाम्रा मुद्दाहरु राजनीतिक कार्यदिशा र दृष्टिकोण जनतामा सोझै पुग्न सकियोस् ।’

उनले चुनावी गठबन्धन गर्दा पार्टीको विचार र सिद्धान्त जनतासम्म लैजाने मौका नमिलेको स्वीकारे ।

नेता सापकोटाले थपे, ‘चुनावमा गठबन्धन गर्दा कहीं न कहीं गठबन्धनभित्रको अरु पार्टीको पनि सन्तुुलन मिलाउनुपर्ने हुनाले हाम्रो विचार सिद्धान्त लाने मौका मिलेको थिएन । त्यसैले जनतामा जाने अवसरको रुपमा लिएका छौं । वर्गसँगको सम्बन्ध फर्काउने, जनतासँगको सम्बन्ध नजोडिएको जस्तो भएको समीक्षा भएको छ ।’

उनले जनताले रुचाएकै कारणले एमालेसँग सहकार्य थाले पनि धोका दिएको आरोप लगाए ।

नेता सापकोटाले भने, ‘कम्युनिष्ट पार्टीहरुको मिलनलाई जनताले रुचाइएकाले अगाडि बढाएका थियौं, तर रक्षा गर्न सकेनौं । त्यो नसकेपछि हामीले समीक्षा गर्दै एमालेसँग समीकरण गरेका थियौं, एमालेसँग परसम्म जाने सहमति तोडेर कांग्रेससँग मिल्नुभयो ।’

उनले समाजवादी मोर्चा हुँदै अग्रगामी शक्तिहरुको एकता हुने जिकिर गरे ।

प्रवक्ता सापकोटाले थपे, ‘कम्युनिष्ट पार्टीको पुनर्गठनको लागि निरन्तर प्रयास गरिराख्नुपर्छ । समाजवादी मोर्चालाई विस्तार गर्दै बृहत वामपन्थी एकतासम्म पुग्छौं, कम्युनिष्ट पार्टीबीच एकता पनि हुन्छ ।’

देशमा समाजवाद स्थापनाको लागि माओवादीले नै नेतृत्व गर्नुको विकल्प नभएको उनको भनाइ छ ।