देशमा थोरै सीटको च्याँखे दाउ सकियाे, ८४ मा तरक्की गर्नुस्: गोकुल बाँस्कोटा

काठमाडौं । नेकपा एमालेका सांसद गोकुल बाँस्कोटाले देशमा थोरै सीटको च्याँखे दाउ सकिएको भन्दै साना दललाई ८४ मा तरक्की गर्न सुझाएका छन् ।

प्रतिनिधिसभामा आज बोल्दै उनले नेकपा माओवादी केन्द्र तथा नयाँ दल रास्वपाका सांसदहरुलाई कटाक्ष गरे । माओवादी लक्षित गरेर बाँस्कोटाले माओवादीले अपवित्र गठबन्धन भएकोमा ‘कुन गौतले छर्किँदा शुद्ध हुन्छ’ भन्दै प्रश्न गरेका थिए ।

सबै दल सबैसँग मिलेको भन्दै उनले माओवादीलाई लक्षित गरेर सोधे, ‘३२ सीटले सत्ताको तालाचाबी मेरो होइन भनेर सोच्नु भो ?’

रास्वपालालई संकेत गर्दै बाँस्कोटाले सत्ताको र सरकारको ढोक्सामा परेको भन्दै सहीलाई सही र गलतलाई गलत भन्ने अवस्थामा रास्वपा नभएको भन्दै आलोचना गरे ।

उनले भने, ‘अब नयाँ को रह्यो, पुरानो को रह्यो ? दुईदुई पटक सत्तामा सहभागिता भयो । यो संसदको गणित यस्तो रहिरहँदा, हाम्रो निर्वाचन प्रणाली यो रहिरहँदा यी दिनहरु दोहोरिराख्छन् ।’

संविधान संशोधन हुँदा समावेशिता नसकिने भन्दै बाँस्कोटाले भने, ‘समावेशिता हाम्रो सिद्धान्त हो । समावेशिता नेपाली राजनीतिको सिद्धान्त हो ।’

आरक्षणबारेमा उनले भने, ‘किन ३३ प्रतिशतको कुरा गर्ने ? किन आरक्षणको कुरा गर्ने ? डाइरेक्ट रोटेसनको आधारमा निर्वाचनमा किन लाँदैनौँ ? भाइब्रेन्ट डेमोक्रेसी त्यसरी हुन्छ । किन खल्तीको डेमोक्रेसी बनाउने त ?’

मुलुकमा बाढी पहिरो गएको समस्यादेखि राष्ट्रिय गौरवका आयोजनामा कुनै छलफल सदनमा नभएको पनि बाँस्कोटाले बताए । उनले मेलम्चीमा सिंगापुरमा मुद्दा लड्नमात्रै ५४ करोड दिइएको बताए ।

सीएमसीको नाम लिँदै उनले भने, ‘त्यसको टोटल प्रोपर्टी कति छ नेपालमा ? उसको बैंक डिपोजिट कति छ ? उसको मेसिनरी कति छ यहाँ ?’

कूटनीतिक मुद्दामा बाँस्कोटाले भने, ‘हामी दुइटा हात्तीको बीचमा छौं । हात्तीले पिरती लगाउँदा पनि बगैंचाको सत्यनास हुन्छ । हात्तीले जुध्दा पनि सत्यनास हुन्छ । नेपालको बगैंचाको सुरक्षा गर्ने पो अभिव्यक्ति दिनुप¥यो । जान्या छ भनेर, धेरै पढेको छ भनेर एकदमै अनौठो खालको कुरा व्यक्त गर्नुभएन ।’