साथीको हत्या आरोपमा यूएईमा जेल परेका पहलमान नेपाल फर्किए, ५५ लाख बुझाएका थिए ब्लड मनी

काठमाडौं । संयुक्त अरब इमिरेट्स यूएईमा साथीको हत्या अभियोगमा ५ वर्ष जेल परेका पहलमान थापा मगर नेपाल फर्किएका छन् । सारजाह जेलमा कैदी जीवन बिताइरहेका नेत्रवती गाउँपालिका-४ धादिङका मगर बुधबार बिहान नेपाल फर्किएका हुन् ।

पहलमानलाई सन् २०१९ को जुन ३ मा मध्यविन्दु नगरपालिका-११ नवलपुरका बाबुराम आलेमगरको हत्या आरोपमा पक्राउ गरी जेल चलान गरिएको थियो । सोही हत्या आरोपमा पहलमानसहित चिसंखुगढी-३ ओखलढुंगाका भुवन श्रेष्ठ पनि संलग्न भएको भन्दै यूएईको उपल्लो अदालतले आजीवन काराबाससँगै ब्लडमनी बुझाउनुपर्ने फैसला गरेको थियो ।

श्रेष्ठ गत बिहीबार नेपाल फर्किएका थिए । एउटै मुद्दामा सँगै जेल परेका दुईमध्ये श्रेष्ठ अगाडि नै फर्किए पनि पहलमानको पासपोर्टको म्याद सकिएकाले सँगै फर्किन पाएनन् । सारजाह जेल र नेपाली दूतावासको समन्वयमा एकतर्फी यात्रा अनुमति पत्र बनाएर पहलमान बुधबार नेपाल फर्किएको नेपाली दूतावास आबुधाबीले जनाएको छ ।

हत्या आरोप लागेका भुवन र पहलमानलाई प्रतिव्यक्ति १ लाख ५० हजार युएई दिराम ( जम्मा ३ लाख दिराम ) पीडित परिवारलाई नेपालमा दिने तथा ५ वर्षको जेल सजाय सारजाहको उपल्लो अदालतले फैसला सुनाएको थियो । जेल सजाय भुक्तान गरिरहेका उनीहरूको उद्धारका लागि नेपालमा अभियान सञ्चालन गरी आर्थिक संकलन गरी पीडित परिवारलाई बुझाइएको थियो । पहलमानलाई नेपाल मगर संघ केन्द्र तथा नेपाल मगर संघ यूएईका पूर्वअध्यक्ष भुवन मगरले विमानस्थलमा स्वागत गरे ।

हत्या आरोपमा जेल जीवन बिताइरहेका भुवन र पहलमानको उद्दारका लागि संसारभरका नेपालीले पैसा संकलन गरेर सहयोग रकम जुटाएका थिए ।

स्थानीय प्रशासनद्वारा अनुसन्धान गरी यूएईका अदालतमा पेश भएका कागजात अनुसार श्रेष्ठ र मगरले मदिरा सेवन गरी आफ्नै साथी नवलपुरका बाबुराम आलेमगरको छुरा प्रहार गरी हत्या गरेको उल्लेख छ ।

आफ्नो श्रीमान बाबुरामको हत्या हुँदा उनकी श्रीमती नरिमा आलेमगर पनि वैदेशिक रोजगारिकै क्रममा यूएईमा भएको र उनैले किटानी जाहेरी दिएकी थिइन । सुनुवाइका क्रममा नेपाली दूतावास आबुधावीका स्थानीय जनसम्पर्क अधिकृत पीआरओ इरफान आलम पनि सहभागी थिए ।

यूएईको अदालतले ब्लडमनीको फैसला गरेपनि सो फैसलालाई तोडमोड गरी दिनगन्ती गर्दै भुवन र पहलमानलाई यसअघि मृत्‍युदण्ड दइन लागेको भन्दै सामाजिक सञ्जालको प्रयोग गरी अनधिकृतरूपमा केही व्यक्तिहरूले रकम असुलेको पाइएको थियो ।

त्यसपछि भुवन श्रेष्ठको बुवा यमनारायण र पहलमानका लागि मगर संघको नेतृत्वमा खाता खोलिएको थियो ।

पीडितलाई बुझाउन संकलन गरिएको ब्लडमनी नेपालमै बुझाए पनि झण्डै ८ लाख रकम पुनः अपुग भएको भन्दै यूएई अदालतले कागजात फर्काएको र पूर्ण रकम लिएको र दिएको कागजात सहित पुनः नेपाली दूतावास अवुधावीका श्रम काउन्सिलर दीनबन्धु सुवेदी स्वयम् आफैँले समन्वयव गरी सारजहाको उपल्लो अदालत, विभिन्न निकाय पुगेर भुवनलाई नेपाल फिर्ता पठाउन पहल गरेका थिए ।

पछिल्लो समय धेरै नेपाली यूएईका जेलमा रहेको र धेरै जसोको मुद्दा लागुऔषधसँग सम्बन्धित रहेको पाइएको भन्दै यहाँको दूतावासले सामाजिक संघसंस्थासँग मिलेर सचेतनामूलक कार्यक्रम गर्न लागेको जनाएको छ ।