अब रोएर फिल्म चलाउँदिन, मसँग पल छ– पूजा शर्मा

काठमाडौं । यहीँ भदौ २१ गतेबाट रिलिजको तयारीमा रहेको चलचित्र ‘रावायण’को टिजर सार्वजनिक भएको छ । शुक्रबार राजधानीमा एक कार्यक्रमको आयोजना गरी चलचित्रको टिजर सार्वजनिक गरिएको हो ।

टिजरमा चलचित्रका नायक पल शाहको एक्सनलाई प्राथमिकता दिइएको छ भने अधिकांश दृश्यमा द्वन्द्वलाई स्थान दिइएको छ । अन्य चलचित्रमा भन्दा फरक गेटअपमा देखिएका पलले खलपात्रसँग गरेको द्वन्द्वलाई नै टिजरमा प्राथमिकतामा राखिएको हो। पलका अलावा १ मिनेट २० सेकेन्ड लामो टिजरमा प्रमोद अग्रहरी र नायिकाद्वय पुजा शर्मा, प्रियंका कार्की र निकिता चण्डक फिचर्ड छन् ।

टिजर सार्वजनिक कार्यक्रममा पुगेकी नायिका तथा चलचित्रकी निर्मात्री पूजा शर्माले अब रोएर फिल्म नचलाउने बताइन। ‘म यस्तो गीत गाउँछु २’ को प्रिमियर कार्यक्रममै रोएपछि उनलाई रोएर फिल्म चलाएको आरोप लागेको थियो। अहिले पनि उनलाई बेलामौकामा यहीँ ट्याग लाग्ने गर्दछ। कार्यक्रमहरुमा उनलाई यसबारे अझै पनि प्रश्न सोधिने गरिन्छ।

यसपाली पनि सायद यहीँ प्रश्न आउँछ भनेर होला उनले सुरुमै अब रोएर फिल्म नचलाउने प्रतिक्रिया दिइन्। कार्यक्रममा बोल्दै उनले भनिन,‘अब रोएर फिल्म चलाइन्न। पल शाह छ मसँग। सुदर्शन थापा अनि हाम्रो टिम फेरि आइसकेको छौँ। त्यहीँ माथि यसपाली हाम्रो टिम झनै बढेको छ।’

पुजाले पलसँगको सम्बन्ध अहिले झनै गहिरो भएको पनि बताइन। पल शाहसँगको आफ्नो बिग्रेको सम्बन्धबारे बोल्दै उनले सुनाइन,‘यस्तो कुराहरु भइरहन्छ। आफ्नो मान्छेसँग नै हो यस्तो हुने। जोसँग नजिक हुइन्छ, जोसँग खुट्टा लाग्छ, उसँग नै हो यस्तो हुने। यो त्यस्तो ठूलो ईस्यु होइन।’

नायक पल शाहले पनि यस चलचित्रले आफ्नो छविमा नयाँ स्वाद थप्ने बताए । उनले चलचित्रमा आफ्नो दोहोरो भूमिका रहेको समेत खुलाए । ‘मेरो लागि यो चरित्र नयाँ हो । चलचित्रमा मैले कान्छा र रागव नामका दुई चरित्र निर्वाह गरेको छु । एउटा चरित्र पोजेटिभ र अर्को नेगेटिभ । चलचित्रमा मेरा लागि नेगेटिभ पार्ट चुनौतिपूर्ण थियो जुन ट्रेलरमा देखिएको छ,’उनले सुनाए।

निर्देशक सुदर्शन थापाले ‘रावायण’ निर्देशन गरेका हुन। कार्यक्रममा बोल्दै उनले आफूले जति बोले पनि आफ्नो ‘भिजन’ फिल्मको टिजरमा देखिएको बताए । ‘अहिले टिजरमा मात्र देखिएको छ । दर्शकले पछि फिल्ममा अझ बढी हेर्न पाउनुहुनेछ’, उनले भने, ‘यो फिल्म मेरा लागि चुनौतिपूर्ण थियो । मैले यो फिल्ममार्फत आफूलाई परिवर्तन गर्ने कोशिस गरेको छु ।’

सुदर्शन थापा प्रोडक्शन र पुजा शर्मा प्रोडक्शनको संयुक्त व्यानरमा बनेको चलचित्रमा नायक पल शाह, नायिका पूजा शमा, प्रियंका कार्की, पूर्व मिस नेपाल निकिता चाण्डक, भिलेन चरित्रमा प्रमोद अग्रहरि, प्रकाश शाह, प्रदीप ढकाल, कैलाश रावल, अर्जुनजंग शाही, शर्मिला मल्ल, आदि लगायतको अभिनय रहेको छ। चलचित्रकी निर्माता पुजा शर्मा हुन् भने सुशन पाठक चलचित्रको कार्यकारी निर्माता छन् ।

चलचित्रमा शिवम अधिकारीको लेखन, प्रदीप श्रीवास्तवको पटकथा, सौरभ लामाको छायांकन, मिलन श्रेष्ठको सम्पादन, निरज सिंह, रेवन आरती सिंहको संगीत, नकासा अजिज, कुनाल गुञ्जवाला, सोनु कक्करको स्वर, डा. कृष्णहरि बराल र प्रदीप श्रीवास्तवको शब्द, विक्रम स्वार र रामजी लामिछानेको कोरियोग्राफी, श्री श्रेष्ठको एक्सन, समीर मियाँको भीएफएक्स, राजेन्द्र मोक्तानको कलर र विजय बस्यालको पोस्टर डिजाइन छ । चलचित्रको वितरण आरआर फिल्मसले गर्नेछ भने डिजिटल पार्टनरको रुपमा ओएसआर डिजिटल रहेको छ ।
क्ए