बिष्णु माझीको झल्को दिने सिमा नेपालीको स्वरमा मौलिक तिजगीत ‘मै छोरीलाई गाह्रो भो’ चर्चामा (भिडियो)

काठमाडौं । चर्चित गायिका बिष्णु माझीको झल्को दिनेगरी गायिका सिमा नेपालीको एकल आवाज रहेको मौलिक तीज गीत ‘मै छोरीलाई गाह्रो भो’ चर्चामा आएको छ । पछिल्लो समय केही गीतले तिज गीतका नाममा विकृति फैलाउदैँ गएको भन्दै आलोचना भइरहेका बेला सुवास रेग्मीले निमार्ण गरेको यो गीतले चर्चा कमाइरहेको हो । गीतकाे एरेन्ज बिस्वास नेपालले गरेका हुन् ।

बिहेपछि पराई घर गएकी छोरीको मर्म र भावनालाई कलात्मक रूपमा समेटिएको यस गीतको शब्द अर्जुन सुवेदीले लेखेका हुन् भने संगीतमा आफूलाई अब्बल साबित गरिसकेका स्तरीय संगीतकार खेम पुनको लय सिर्जनाले गीतमा सुनमा सुगन्ध थपेको छ ।

स्मृति तिमल्सिना (गुरुआमा)ले निर्देशन गरेको गीतको भिडियोमा पछिल्लो समय एकदमै चर्चामा रहेकी मोडल निहारिका थापाको मुख्य नृत्य तथा अभियनसँगै करिब ४० जना कलाकारको नृत्य रहेको छ । नेपाली गीत संगीतको ईतिहासमा यति धेरै कलाकारले नृत्य गरेको सम्भव त यो पहिलो म्युजिक भिडियो रहेको निर्माण पक्षको दाबी छ ।

मोडल निहारीका थापाको अभिनयले शब्द, संगीत र भिडियो तीनै विधालाई न्याय गरेको भिडियोलाई मनोज कार्कीले सम्पादन गरेका हुन् भने करन चैसिरको छाँयाङकन रहेको छ ।

उच्छृङ्खल भन्दा मौलिक, सरल तथा चेलीको वास्तविक कथा वस्तुलाई आधार बनाएर गीत निकाले पनि गीतले चर्चा कमाउँछ भन्ने गतिलो उदाहरण यो गीत बन्न सक्ने निर्माण पक्षको दाबी छ । यो गीतको भिडियो विन्ध्यवासिनी म्युजिक प्रालीको आधिकारिक युटुब च्यानलमार्फत सार्वजनिक गरिएको हो ।

विवाह गरेर गएकी महिलाले आफ्ना भोगाइ अभिव्यक्त गर्न तीज गीत गाउने परम्परा रहे पनि अहिले तीजका गीतले शब्द, सङ्गीत, भाका कुनै पनि पक्षमा त्यो मर्म बोक्न नसकेको लोक गायक तथा लोकगीतका जानकारले बताउने गरेका छन् । विशेष गरी हिन्दू नारीले आफ्ना पतिको दीर्घायुको कामना गरेर ब्रत बसी पूजा आजा गरी तीज पर्व मनाउने गर्छन् । यस पर्वमा विवाह भएका छोरी चेलीलाई माइतबाट लिन जाने, तीजको अघिल्लो दिन सबै बसेर मीठा (मीठा परिकार) ‘दर’ खाने र भोलिपल्ट निराहार बसी ब्रत गर्ने परम्परा रहदैँ आएको छ ।

नेपाली नारीले भोग्नुपरेको अभाव, पीडा, व्यथा, अन्याय आदिका आवाज तीज गीतमा घन्किने गर्छन । आफ्नो घरका पीडा र व्यथा माइतीमा गएर साथीसंगी जम्मा भई थपडी बजाएर गाउने र कम्मर मर्काउँदै घुमी–घुमी नाच्ने यस पर्वले नारीलाई ठूलो स्वतन्त्रता प्रदान गरेको महसुस हुने गर्दछ ।

पछिल्लो सयम तीज गीतका नाममा केही छाडापनका गित सार्वजानिक भईरहेको बेला मौलिक तिजगित ‘मै छोरीलाई गाह्रो भो’ यति बेला आम दर्शकले वास्तविक तिज गीतको संज्ञा दिइरहेका छन् । गीतमा बिहेपछी पराइ घर गएकी छोरीको मर्म र भावनालाई कलात्मक रूपमा समेटिएको छ ।