नेकपा एसको केन्द्रीय कमिटीमा नअटाएका प्रेम आले किन असन्तुष्ट छन् ?

काठमाडौं । नेकपा एकीकृत समाजवादीले महाधिवेशन भएको एक महिनापछि पार्टीको केन्द्रीय कमिटीलाई पूर्णता दिएको छ । आकांक्षी धेरै भएपछि विधानविपरीत सदस्य संख्या बढाएर हिजो बसेको बैठकले केन्द्रीय कमिटीलाई पूर्णता दियो ।

असार १६ गतेदेखि पाँच दिनसम्म चलेको महाधिवेशनले तीन पदाधिकारीसहित ९३ सदस्यीय केन्द्रीय कमिटी घोषणा गरेको थियो । त्यसबेलामा साविक पोलिटब्युरो कमिटीमा रहेकाहरूलाई केन्द्रीय सदस्य घोषणा गर्दा प्रेम आले अटाएका थिएनन् ।

नेकपा एसमा प्रत्यक्ष निर्वाचित सांसद १० मध्ये आले पनि एक हुन्, तर हिजो २९९ बाट ३४४ सदस्यीय केन्द्रीय कमिटी बनाउँदा पनि आले कमिटीमा अटाएनन् ।

पछिल्लो समय नेतृत्वप्रति असन्तुष्ट आले पार्टीको १०औं महाधिवेशनमा सहभागी नै भएनन् । काठमाडौंमा महाधिवेशन चलिरहँदा उनी भारत भ्रमणमा थिए ।

नेकपा एसका उपाध्यक्ष राजेन्द्र पाण्डेले महाधिवेशनमा उपस्थित नभएका कसैलाई पनि केन्द्रीय कमिटीमा नल्याएको बताए । उनले अरु कुनै कारण नरहेको प्रष्ट्याए ।

तर, आले फागुन २१ गते एमाले माओवादी गठबन्धनको पक्षमा पार्टी उभिएपछि नेतृत्वदेखि रुष्ट रहेको एक पदाधिकारीले बताए ।

ती पदाधिकारीले भने, ‘फागुन २१ गते एमालेसँगको गठबन्धनको विरोधी हुनुहुन्थ्यो, त्यो गठबन्धनमा जानै हुँदैनथ्यो भन्ने उहाँको मत थियो । राजेन्द्र पाण्डेजीले खुलैरै विरोध गर्नुभएको थियो । उहाँको पनि त्यही लाइन थियो । त्यसैले उहाँ असन्तुष्ट देखिनुभएको छ ।’

फागुन २१ को गठबन्धनमै मिसिएका कारणले अहिले पार्टी सत्ता बाहिर पुग्ने स्थिति बनेको उनको बुझाइ रहेको ती नेताको दाबी छ ।

ती नेताले थपे, ‘त्यही (कांग्रेससँगको) गठबन्धनमा हुँदाहुँदै हाम्रै कारणले ओलीलाई कांग्रेससँग जोडाइदिने काम गर्‍यो । त्यो गल्ती भयो भन्ने उहाँको मत थियो । उहाँको विचार ठीक हो भन्नेमा अहिलेको परिस्थितिले देखाएको छ ।’

पार्टी नेतृत्वसँग असन्तुष्ट देखिए पनि पार्टी छाड्ने मूडमा भने नरहेको ती नेताको दाबी छ । महाधिवेशनको हलले ९३ जना केन्द्रीय सदस्य घोषणा गर्दा आफ्नो नाम नपरेपछि आलेले नेकपा एससँग आफ्नो कुनै साइनो नभएको मिडियामा अभिव्यक्ति दिएका थिए, तर पार्टी संसदीय दलको निर्णय भने मान्दै आएका छन् ।