प्रधानमन्त्री ओलीलाई नीति शाहले सोधिन्- हजुरको अर्को फिल्म कहिले ?

काठमाडौं । प्रधानमन्त्री केपी शर्मा ओलीले क्रिकेट रंगशाला निर्माणका विषयमा छलफल गर्न भन्दै आफ्नो निवास बालुवाटारमा आज बिहान एउटा जमघट राखे । क्रिकेटका सरोकारवालाहरु सहभागी हुनुपर्ने यो जमघटमा अप्रासंगिक रुपले कलाकारहरुको बाहुल्यता थियो ।

नेपाली क्रिकेटको विषयमा चासो राख्ने सामाजिक सञ्जालमार्फत क्रिकेट खेलाडीहरुलाई प्रोत्साहन दिने कलाकारहरु प्रधानमन्त्रीको पाहुना बन्न पाए । यो सूचीमा थिए- प्रकाश सपूत, केकी अधिकारी, बद्री पंगेनी, रचना रिमाल, नीति शाह, मेरिना मगर, राजाराजेन्द्र पोखरेल आदि ।

औपचारिक बैठकका साथै प्रधानमन्त्री ओलीले बालुवाटारको प्राङ्गणमा आफ्ना पाहुनाहरुसँग अनौपचारिक गफगाफ पनि गरेका थिए । त्यसक्रममा हाँसोठट्टा पनि चल्यो ।

नायिका नीति शाहले प्रधानमन्त्री केपी शर्मा ओलीलाई जिस्काउँदै सोधिन्, ‘हजुरको नेक्स्ट फिल्म अब कहिले आउँछ ?’

सबै जना गलल हाँसे । प्रधानमन्त्री ओलीले हिजोमात्रै आफू अभिनित फिल्म ‘नमेटिने घाउ’ को डबिङ गरेका थिए । एसिड पीडितहरुको कथामा बनेको यो फिल्ममा ओलीले प्रधानमन्त्रीकै भूमिका निर्वाह गरेका छन् । यसैलाई लिएर नीतिले जिस्काएकी हुन् ।

ओलीले जवाफ दिए, ‘रिटायर्ड भएपछि खेलौं कि क्या हो अब हजुरबाको रोलमा ।’

नीतिले भनिन्, ‘हजुरबा होइन, हिरोकै रोलमा होला । सुपरस्टार ।’ फेरि हाँसो गुञ्जियो ।

अनौपचारिक कुराकानीका क्रममा ओलीले कीर्तिपुर मैदानमा फ्लडलाइट राख्न कति समय लाग्छ भनेर क्यानका सचिव पारस खड्कालाई सोधेका थिए । खड्काले कम्तीमा १२० दिन लाग्ने बताए ।

ओलीले भने, ‘१२० दिन लाग्छ है ?’

खड्काले सरकारले निर्णय गरेअनुसार ३०० दिनभित्र रंगशाला निर्माण पूरा हुन कठिन रहेको संकेत गरे ।

उनले भने, ‘औपचारिक प्रक्रियाबाट जाँदा त गाह्रो छ । प्रधानमन्त्रीज्यूले निर्देशन दिएर सचिवालय र मन्त्रालयमार्फत समन्वय हुने हो भने ३०० दिनमा ८०-९० प्रतिशत काम हुनसक्छ ।’