रास्वपा नेताहरु ५ दिन सार्वजनिक बसमा: अनुभव कि स्टन्ट ?

काठमाडौं । राष्ट्रिय स्वतन्त्र पार्टीका नेताहरु सार्वजनिक बसमा यात्रा गरेका तस्विर र भिडियोहरु अहिले सामाजिक सञ्जालमा यत्रतत्र छरिएका छन् । सस्तो लोकप्रियताका लागि ‘स्टन्ट’ गरेको आरोप उनीहरुमाथि लागिरहेको छ ।

रास्वपाले पार्टीको भावी कार्यदिशा र रणनीति तय गर्न दुई दिने बन्द कार्यशाला गत शुक्रबार र शनिबार राखेको थियो । उक्त कार्यशाला सकिएपछि समापनका क्रममा सभापति रवि लामिछानेले सबैजना सार्वजनिक यातायात चढेर जाने प्रस्ताव राखे । त्यसपछि नेताहरुबीच सार्वजनिक यातायातका समस्याहरुलाई गहिरोसँग बुझ्न पाँच दिन सबैले सार्वजनिक यातायात प्रयोग गर्ने अनौपचारिक कुराकानी भएको सहमहामन्त्री विपीन आचार्य बताउँछन् ।

‘यो हामीले बैठकमा गहन छलफल गरेर निर्णय गरेको विषयवस्तु होइन, सभापतिज्यूले अनौपचारिक रुपमा प्रस्ताव गर्नुभयो, सबै जना सहमत भयौं’, उनले नेपाल प्रेससँग भने, ‘हामीले संसदमा सार्वजनिक सवारीसाधनलाई प्रभावकारी बनाउने विषयमा सार्वजनिक महत्वको प्रस्ताव राख्न लागेकाले पनि यो विषयवस्तु आएको हो ।’

त्यस दिन कार्यशालामा सहभागी सबै नेताहरु आआफ्ना निजी सवारीसाधन पार्टी कार्यालयमै छोडेर घर फर्किएका थिए । यस क्रममा सभापति रवि लामिछानेलगायतका केही नेतालाई युट्युबरहरुले पछ्याएर उनीहरु सार्वजनिक सवारीसाधनमा यात्रा गरेको भिडियो पोस्ट गरे । तिनै भिडिओ अहिले चर्चामा आएका हुन् ।

रास्वपाले ५ दिन सबैले सार्वजनिक यातायात चढ्नैपर्ने भनेर बाध्यकारी गरेको भने होइन । कसैले यसको उल्लंघन गरेको खण्डमा कुनै कारबाही भोग्नुपर्ने छैन । सांसदहरु तथा केन्द्रीय सदस्यहरुले ‘अत्यावश्यक अवस्थामा’ बाहेक सार्वजनिक यातायात चढ्ने भनिएको छ । रास्वपाका कतिपय केन्द्रीय सदस्यहरु नियमित रुपमै सार्वजनिक यातायात प्रयोग गर्ने पनि छन् ।

रास्वपाको यो नयाँ अभ्यासलाई लिएर सामाजिक सञ्जालमा प्रतिक्रिया मिश्रित छ । एकथरिले सार्वजनिक यातायातको समस्या बुझ्न केही दिन आफैंले अनुभव गर्न खोज्नु सही पनि मानेका छन् । आलोचकहरुले भने सधैं जस्तो यसलाई ‘स्टन्टबाजी’ को संज्ञा दिएका छन् ।

विवेकशील साझा पार्टीकी महासचिव रञ्जु दर्शनाले फेसबुकमा स्टाटस लेख्दै रास्वपाप्रति कटाक्ष गरेकी छन् ।

उनको स्टाटस यस्तो छ :

‘मेरो एकजना साथीलाई Vegetarian मानिसहरूको जिन्दगीमा research गर्न मन लाग्यो रे ! त्यसैले अब ५ दिनलाई मासु नखाई “Veg” हुने निर्णय गरेका छन् !

यति गरेपछि उनी भेजहरूलाई भेज हुनु भनेको के हो भनेर प्रवचन दिन सक्ने हुन्छु भन्छन् । अनि आफू भेज नै हो भन्ने विश्वास दिलाउन सक्छु पनि भन्छन् ।

फेरि छैटौं दिनदेखि भने non-veg नै हुने हो रे !

यस्तो नाटक नरचन भनेको, मानेनन् !’

रास्वपाका सहमहामन्त्री आचार्यले भने सामान्य विषयलाई अनावश्यक रुपमा ठूलो बनाइएको टिप्पणी गरे । पार्टीले कुनै पनि फरक काम गर्नासाथ ‘स्टन्ट’ को संज्ञा दिन थालिएको उनको गुनासो छ ।

उनको भनाइ यस्तो :

यो कुनै ठूलो विषय थिएन । यति धेरै चर्चा र टिप्पणी होलान् भन्ने सोचेका पनि थिएनौं । अचानक आएको प्रस्ताव हो । सबैको सहमतिमा गरौं न त भन्ने भयो ।

यो आलोचना गरिरहनुपर्ने विषय हो जस्तो लाग्दैन, तर अहिले जे कुरामा पनि नकारात्मकता खोज्ने बानी परिसकेको छ । केही फरक गर्न खोज्यो कि स्टन्टको संज्ञा दिइन्छ । हामीले विगतमा ‘स्टन्ट’ भनेर सिनेमामा देखाइने साहसिक दृश्यहरुलाई बुझ्थ्यौं । अहिले त जे पनि स्टन्ट भन्न थालियो ।

रञ्जु दर्शनाले कुन सन्दर्भमा लेख्नुभयो मलाई थाहा छैन । त्यसो हो भने त महिनामा एकदुई दिन व्रत किन बस्ने ? धेरै मानिस साउनमा माछामासु खानुहुन्न, त्यसको के अर्थ भयो ? पाँच दिन गाडी चढेर के हुन्छ भन्नेलाई म प्रतिप्रश्न गर्न चाहन्छु, यसबाट घाटा चाहिँ के हुन्छ ? कसलाई हानि हुन्छ ?

सबै साथीहरुले आआफू पब्लिक गाडी चढेर मिडियामा बोलाएको पनि होइन । उहाँहरुले आफैंले थाहा पाएर फलोअप गर्नुभएको होला । नत्र हामी त धेरै हल्लाखल्ला गर्ने पक्षमा पनि थिएनौं ।

पब्लिक गाडी हामी अहिले पनि यदाकदा चढिरहेकै हुन्छौं । हाम्रो लागि कुनै एड्भेन्चर होइन, तर हामीले संसदमा प्रस्ताव लैजाने क्रममा आफैंले केही दिन चढेर हेरौं न भन्ने भयो । पब्लिक गाडीमा हिँड्दा धेरै किसिमका मानिससँग साक्षात्कार हुन्छ । जनभावना बुझ्न सकिन्छ । सार्वजनिक यातायाताका समस्याहरुलाई आफैंले महसुस गर्न सकिन्छ ।

मेरो विचारमा मूल रुपमा चार वटा समस्या छन् । पहिलो- यसमा समयको धेरै बर्बादी हुन्छ । गाडीहरु ठाउँठाउँमा रोक्ने र यात्रुको प्रतीक्षामा धेरै बेर रोक्ने हुँदा समयमा गन्तव्यमा पुग्न कठिन हुन्छ । दोस्रो- सिट क्षमताभन्दा धेरै संख्यामा यात्रु चढाउँदा कोचाकोच हुन्छ । यसबाट विशेषगरी महिला यात्रुलाई असुविधा हुने गरेको छ । तेस्रो- सार्वजनिक यातायातको गुणस्तर कमजोर छ । हाम्रोमा बाटोघाटोको कारणले पनि सवारीसाधनहरु चाँडै थोत्रिन्छन् । तिनीहरुको राम्रो मेन्टेनेन्स भएको हुँदैन ।

यी तीन कुरामा सुधार गर्न सकियो भने जोकोही पनि निजी सवारी छोडेर सार्वजनिकमा यात्रा गर्न सक्छन् । त्यो भएमा सडकमा सवारीको चाप पनि कम हुन्छ ।