सोविता गौतमलाई आफ्नै निर्वाचन क्षेत्रमा कसले गर्‍यो ‘दुर्व्यवहार’ ?

काठमाडाैं । राष्ट्रिय स्वतन्त्र पार्टीकी सांसद सोविता गौतमलाई उनकै निर्वाचन क्षेत्रभित्र केही युवाहरुले अमर्यादित व्यवहार गरेका छन् । यस विषयमा गौतमले आज संसदमा पनि ध्यानाकर्षण गराइन् ।

अविरल वर्षा र बाढी–पहिरोले गरेको क्षतिको अवलोकन गर्न हिजो बिहानैदेखि उनी आफ्नो निर्वाचन क्षेत्रमा पर्ने विभिन्न स्थानमा पुगेकी थिइन् ।

यस क्रममा करिब साँझ ५ बजे उनी कागेश्वरी मनोहरा नगरपालिका वडा नम्बर ६ मा पर्ने मनकामना टोलमा घटना भएको हो । केही युवाहरुले उनलाई घेरेर हुलहुज्जत गरेका थिए । सोवितासँग उनकी स्वकीय सचिव प्रकृती न्यौपाने मात्र थिइन् ।

मुलपानी क्रिकेट रंगशालाबाट विपरीत डाँडापट्टि एउटा चौतारो र त्यसनजिक चियापसल छ । त्यो कटेपछि एउटा बस्ती आउँछ । उक्त बस्तीमा पहिरो गएको ठाउँ देखाउनका लागि केही स्थानीयहरु चिया पसलमा उनलाई पर्खेर बसेका थिए । सोविता उनीहरुसँगै पहिरो गएको स्थान अवलोकन गरेर करिब आधा घन्टामा फर्किइन् ।

फर्किने क्रममा उनले चिया पसल अगाडि केही युवाहरुको हुल देखिन्, जो अघि त्यहाँ थिएनन् । उनीहरु सबै झगडाको मुडमा थिए । सोविताको गाडी आउनासाथ उनीहरुले घेराउ गरे ।

उनीहरुमध्येका एकजनाले ‘तपाईं बुढाहरुको मात्र कुरा सुन्ने, युवाहरुलाई वास्ता नगर्ने ?’ भनेपछि सोविता गाडीबाट ओर्लेकी थिइन् । त्यसपछि आफूमाथि उनीहरु अमर्यादित तवरले पेश भएको र फोहोरी शब्दहरुसमेत प्रयोग गरेको सोविताको आरोप छ ।

‘माननीयज्यू उहाँहरुको कुरा सुन्छु भनेर गाडीबाट निस्किनुभयो, तर उनीहरुको नियत अर्कै रहेछ’, सोवितासँग रहेकी स्वकीय सचिव न्यौपानेले भनिन् ।

न्यौपानेको भनाइमा ती युवाहरुसँग खास कुनै मुद्दा वा माग थिएन । उनीहरु केवल उत्तेजना र उच्छृंखलता देखाइरहेका थिए ।

‘उहाँहरुको प्रस्तुति हेर्दा जसरी पनि माननीयज्यूलाई प्रोभोक गर्ने र भिडिओ बनाएर सामाजिक सञ्जालमा हाल्ने जस्तो देखिन्थ्यो’, न्यौपानेले भनिन्, ‘तर, माननीयज्यूले संयमित भएर नै उनीहरुलाई जवाफ दिनुभयो ।’

असुरक्षाको अवस्था आएपछि सोविता र प्रकृती त्यहाँबाट हिँडेका थिए । बाटोबाटै प्रकृतीले बौद्ध प्रहरीको डीएसपीलाई फोन गरेर जानकारी गराएकी थिइन् ।

उनले भनिन्, ‘पछि हामीलाई स्थानीयहरुले फोन गरेर जानकारी गराउनुभयो कि ती युवाहरु २४ सै घन्टा गाँजा र रक्सी खाएर बस्दा रहेछन् । उनीहरुमध्ये एक व्यक्ति एउटा राष्ट्रिय पार्टीको जिम्मेवार कार्यकर्तासमेत हुनुहुँदो रहेछ ।’

भिडिओमा देखिएका एक व्यक्ति राष्ट्रिय प्रजातन्त्र पार्टीका कार्यकर्ता सुदीप फुयाल भएको खुलेको छ । राप्रपा अध्यक्ष राजेन्द्र लिङ्देनसँग खिचेको तस्बिर उनले आफ्नो फेसबुकको कभरमा हालेका छन् ।

हिजै साँझ ६ः२३ मा उनले उक्त घटनाको भिडिओ आफ्नो फेसबुक पेजमा अपलोड गरेका थिए । तर, आफूहरुले गालीगलौज गरेको पार्ट हटाएर सोविताले जवाफ दिएको पार्ट मात्रै उनले हालेका छन् ।

उनले क्याप्सन लेखेका छन्, ‘आफ्नै क्षेत्रका युवाहरुले समस्याहरु राख्दा तर्केर हिँडिन् काठमाडौं २ कि संघीय सांसद सोविता गौतम ।’

संसदमा शोभिताले एक राष्ट्रिय पार्टीका जिम्मेवार व्यक्ति भने पनि पार्टीको नाम र निजको परिचय खुलाएकी थिइनन् ।