कर्णालीका पूर्वमुख्यमन्त्री शर्माको प्रश्न- १० हजारलाई रोजगारीमा जोड्ने निर्णय किन गुमनाम भयो ?

सुर्खेत । कर्णालीका पूर्वमुख्यमन्त्री राजकुमार शर्माले वार्षिक १० हजारलाई रोजगारीमा जोड्ने निर्णय गुमनाम भएको बताएका छन् ।

सोमबार मुख्यमन्त्री यामलाल कँडेलले प्रदेशसभासमक्ष राखेको विश्वासको मत लिने प्रस्तावमाथिको छलफलमा शर्माले वार्षिक १० हजारलाई रोजगारीमा जोड्ने निर्णय कानून निर्माण गर्दागर्दै ढिला भएको बताए ।

शर्माले प्रश्न गरे, ‘१० हजारलाई रोजगारीमा जोड्ने निर्णय किन गुमनाम भयो ? कति बजेट छुट्याइयो, जवाफ छ ? लघु वित्तीय बैंकका कुरा किन अगाडि बढाइएन, जवाफ छ ? तपाईंको जवाफ कर्णालीका जनताले लुटेर, सबै बेचेर खाए, देश नाङ्गो बनाए भन्ने हो ?’

कर्णाली पिछडिएको मात्रै नभएर पछाडि पारिएको शर्माले बताए । प्रदेशका कतिपय योजना अलपत्र रहेको र त्यसलाई सच्याउन आवश्यक रहेको उनको भनाइ छ ।

‘राज्यको तलब र जनताको पसिना खाएर कर्मचारी संघीय मन्त्रालयको बार्दलीमा घाम ताप्दै बस्छन् । प्रदेश भने खाली हुने, यो प्रवृत्तिलाई यस बलियो सरकारले पूरा गर्ला कि ?’, पूर्वमुख्यमन्त्री शर्माले भने, ‘वित्तीय, प्रशासनिक, कानूनी संघीयता कहाँ छ ? उठ भने उठ्नुपर्ने, बस भने बस्नुपर्ने, यो बाध्यतामा हामी किन छौं ?’

शर्माले भने हाम्रो गतिविधिले संघीयताको रक्षा गर्न नसक्ने बताए । गठबन्धन हुने कुरा नयाँ नभएको भन्दै उनले जनमतअनुसार गठबन्धन कहिले यता र कहिले उता हुने हुँदा यसलाई नौलो रुपमा लिन नहुने बताए ।