जम्बो मन्त्रिपरिषद् बनाएका मुख्यमन्त्रीको बचाउमा सिके राउत : मन्त्रालय संख्या कांग्रेस-एमालेले निर्धारण गरेका हुन्

काठमाडौं । मधेश प्रदेश सरकारको नेतृत्व डा. सिके राउत नेतृत्वको जनमत पार्टीले गरिरहेको छ। मधेश सरकारको नेतृत्व जोगाउनकै लागि जनमतले कांग्रेस एमाले गठबन्धनको पक्षमा उभिएको छ।

संघमा प्रधानमन्त्री केपी शर्मा ओली नेतृत्वको सरकारलाई समर्थन दिए पनि सरकारमा पनि ठाउँ पाएको छैन। मधेश प्रदेशका मुख्यमन्त्री मुख्यमन्त्री सतिशकुमार सिंहले हिजो ५ राज्यमन्त्रीको शपथ गराएसँगै मन्त्रीको संख्या २० पुगेको छ।

संघमा २५ सदस्यीय मन्त्रिपरिषद् छ। तर प्रदेश संरचनाबारे चर्को आलोचना भइरहेको बेलामा मुख्यमन्त्री सिंहले पनि जम्बो मन्त्रिपरिषद् बनाएपछि चर्को आलोचना भइरहेको छ।

तर, जनमत पार्टीका अध्यक्ष राउतले भने मधेश सरकार जनमतको मात्रै नभई, गठबन्धनको हो भन्ने बुझ्नुपर्ने तर्क गरेका छन्।

उनले मुख्यमन्त्रीको बचाउमा भनेका छन्, ‘गठबन्धन र खासगरी दुई ठुला पार्टीले निर्धारण गरेको हो कि कति मन्त्रालय कसले राख्ने, कति राज्यमन्त्री राख्ने, कुन कुन मन्त्रालय कसले राख्ने ? यसमा हाम्रो केही चल्दैन किनकि जनमत पार्टीको सीट संख्या मधेश प्रदेशमा पनि निर्णायक होइन।’

अहिलेकै गठबन्धनमा पनि जनमत बिना नै मधेश सरकार बन्ने भएकाले आफूहरूले चाहेर मात्रै नहुने बताएका छन्।