कांग्रेसले नाम दिएकै दिन कोशीमा सरकार विस्तार हुन्छ : मुख्यमन्त्री कार्की (भिडिओ)

विराटनगर । कोशी प्रदेशका मुख्य मन्त्री हिक्मत कुमार कार्कीले कांग्रेसले विलम्ब गरेका कारण सरकार विस्तार हुन नसकेको बताएका छन् ।

आइतबार पत्रकारसँग भएको अन्तरसंवादमा मुख्यमन्त्री कार्कीले सरकार विस्तारमा अझै २–४ दिन समय लाग्ने बताए । उनले भने, ‘आज पनि कुरा भएको थियो उहाहरुले अझै समय माग गर्नु भएको छ ।’

नेपाली कांग्रेससँग राष्ट्रिय आवश्यकताका कारण सहकार्य भएको भन्दै आन्तरिक कुरा मिलाउन कांग्रेसले समय माग गरेको बताए । उनले बजेट पास भएपनि गति लिन नसकेको बताए । उनले सरकार विस्तार भएपछि सरकारको काम नयाँ चरणमा प्रवेश गर्ने बताए ।

कांग्रेसले निर्णय गरेकै दिन सरकारले पूर्णता पाउने मुख्यमन्त्री कार्कीले बताए । उनले सरकारले १ सय दिनमा उल्लेख्य प्रगती गरेको बताए । उनले भने, ‘यो अवस्थामा पनि हामीले काम केही काम गरेका छौं । यसका बारेमा चाँडै सार्वजनिक गर्छौं ।’

कांग्रेसले सरकार विस्तारका लागि समय मागेकाले पनि संसद बोलाउन नसकेको बताए । मन्त्रालय बाँडफाटमा कुरो मिलेको भएकाले मन्त्रालयको संख्या नबढाउने बताए ।

उनले बढाउनै परे ११ भन्दा बढि मन्त्रालयको संख्या नहुने दाबी गरे । उनले बजेटमा केही समस्या देखिए पनि यसलाई मिलाएर जाने बताए । कांग्रेस सरकारमा आएपछि बजेटमा कानूनले दिएको अधिकार प्रयोग गरेर बजेट मिलाउने उनले बताए ।