रक्षामन्त्री राईद्वारा जङ्गी अड्डाको निरीक्षण भ्रमण

काठमाडौं । रक्षामन्त्री मानवीर राईले जङ्गी अड्डाको निरीक्षण भ्रमण गरेका छन् । रक्षामन्त्रीमा नियुक्त भएपश्चात् उनले पहिलो पटक जङ्गी अड्डा पुगेर नेपाली सेनाको बारेमा जानकारी लिएका हुन् ।

रक्षामन्त्री राईको सम्मानमा जङ्गी अड्डामा आयोजित कार्यक्रममा नेपाली सेनाको सङ्गठनात्मक स्वरूप, तैनाथी, स्वदेश र अन्तर्राष्ट्रिय क्षेत्रमा सञ्चालन गरिरहेका विविध गतिविधिका बारे जानकारी गराइएको थियो ।

कायममुकायम प्रधान सेनापति रथी अशोकराज सिग्देलले नवनियुक्त रक्षामन्त्री राईलाई नेपाली सेनाका सकल दर्जाको तर्फबाट जङ्गी अड्डामा स्वागत गरेका थिए ।

उक्त अवसरमा रक्षामन्त्री राईले राष्ट्र सेवाप्रति अविचलित समर्पण तथा यस क्रममा नेपाली सेनाले देखाएको दृढता सधैँ प्रशंसनीय रहेको उल्लेख गरे । समग्र राष्ट्रको, सेनाप्रतिको भरोसालाई कायमै राख्दै आफूलाई प्राप्त संविधान प्रदत्त जिम्मेवारीहरू एवम् अन्य सबै प्रकारका चुनौतीपूर्ण कार्यहरू निर्वाह गर्न भविष्यमा पनि नेपाली सेना सफल हुनेमा उनले विश्वास व्यक्त गरे ।

उनले नेपाली सेनाको समग्र क्षमता अभिवृद्धि तथा सङ्गठनात्मक सुदृढीकरणमा रक्षा मन्त्रालयले सदैव सकारात्मक भूमिका निर्वाह गरिरहने बताउँदै उच्च हौसलासहित कर्तव्यपथमा समर्पित रहिरहन नेपाली सेनाका सकल दर्जालाई आह्वान गरे ।

त्यस्तै रक्षा सचिव रामेश्वर दङ्गालले नेपाली सेनाको समय सापेक्ष क्षमता विकास एवम् आधुनिकीकरण, दीर्घकालीन सोच २०८७ को सफल कार्यान्वयन, विकास निर्माणका कार्यहरूमा सहजीकरणका लागि नेपाली सेनालाई आवश्यक पर्ने नीतिगत, प्रक्रियागत, बजेटलगायतका विषयमा सहयोग एवम् सहजीकरणको लागि मन्त्रालय प्रतिबद्ध रहेको जानकारी गराए ।

कायममुकायम प्रधान सेनापति रथी सिग्देलले गौरवशाली संस्थाको परम्पराअनुरूप सङ्गठनलाई अगाडि बढाउन अग्रजहरूको अथक प्रयासबाट स्थापित नेपाली सेनाका मूल्य र मान्यतालाई अझ मजबुत र संस्थागत गर्नेतर्फ आफ्नो निरन्तर पहल रहने बताए ।

उनले नेपाली सेनाको अपरेशनल क्षमता थप अभिवृद्धि गर्न रक्षा मन्त्रालयबाट प्राप्त साथ, सहयोगप्रति आभार व्यक्त गर्दै आगामी दिनहरूमा समेत रक्षा मन्त्रालय तथा नेपाली सेनाबीचको सम्बन्ध थप प्रगाढ र सुदृढ हुने विश्वास व्यक्त गरे ।