बंगलादेशमा साउदी अरबले कामदारलाई दिन थाल्यो भिसा

काठमाडौं । बंगलादेशमा भएको आन्दोलनलगत्तै बन्द गरिएको भिसा सेवा साउदी अरबले बुधबारबाट पुनः सुरु गरेको छ । बंगलादेशी अखबार ढाका ट्रिब्युनका अनुसार बंगलादेशका लागि साउदी अरबका राजदूत इसा बिन युसुफ अल दुहाइलानले यो जानकारी सार्वजनिक गरेका हुन् ।

बंगलादेशको अन्तरिम सरकारका विदेशमन्त्री महमद ताउहिन हुसेलाई भेट्दा उनले यस्तो जानकारी साझा गरेको अखबारले उल्लेख गरेको छ ।

राजदूतले दैनिक औसतमा पाँच हजार भिसा दिन सुरु गरिएको जानकारी दिएका छन् । हालसालै भारतमा भएकी बंगलादेशकी निवर्तमान प्रधानमन्त्री शेख हसिनाले साउदी अरबमा शरण लिने कुरा चुलिएको थियो, तर योबारेमा जानकारी लिन खोज्दा राजदूतले कुनै जानकारी नभएको तथा आफूले नसुनेको बताएको ढाका ट्रिब्युनले लेखेको छ ।