उत्तर कोरियाले खोल्यो पर्यटन, कसरी र कहिले जाने ?

काठमाडौं । बन्द समाज तथा राजनीतिक व्यवस्था भएको मुलुक उत्तर कोरियाले पर्यटन खुला गरेको छ । बेलायती विश्व च्यानल बीबीसीका अनुसार पाँच वर्षपछि उत्तर कोरियाले पर्यटन क्षेत्र खुला गरेको हो । कोभिड–१९ विश्वव्यापी आएपछि बन्द भएको पर्यटन क्षेत्र खुला गरिएको हो ।

आगामी डिसेम्बर अर्थात चार महिनापछि उत्तर कोरिया जाने पर्यटन प्याकेज खुला हुनेछन् । विभिन्न टुर अपरेटरहरुले यो कुरा खुला गरेका हुन् । चीनमा मुख्यालय भएका पर्यटन एजेन्सीका अनुसार उत्तर कोरियाको उत्तरी क्षेत्रको पर्यटकीय केन्द्र साम्जियोनमा पर्यटकहरु जान पाउनेछन् ।

उत्तर कोरियामा पर्यटकहरु लान चिनिएका एजेन्सीहरु केटीजी र कोर्यो टुर्सले यस्तो घोषणा गरेको सीएनबीसीले उल्लेख गरेको छ । सीएनबीसीका अनुसार सन २०१९ मा उत्तर कोरियामा साढे तीन लाख पर्यटकहरु पुगेका थिए ।

विमानस्थल, होटल तथा स्कि रिसोर्टले भरिभराउ उत्तर कोरियाको उत्तरी क्षेत्र साम्जिायोनलाई विकास गर्ने योजनामा उत्तर कोरियाली सर्वोच्च नेता किम जोङ उननै सक्रिय छन् । उनले गत जुलाईमा यसको विकास गर्ने कुरा सार्वजनिक गरेका थिए ।

किमले मित्रवत देशहरुका पर्यटकहरु ल्याएर अन्तर्राष्ट्रिय पर्यटनको विकास गर्ने उद्घोष गरेका थिए । उत्तर कोरिया जान डिसेम्बर सिजनको लागि उत्तर कोरियाली यात्रा गराउने एजेन्सीहरुबाट अग्रिम बुक गरेर जान सकिने बताइएको छ । त्यसरी जान पाउनेहरुमा भने उत्तर कोरियाले मित्रवत देश मानेकाहरुबाट मात्रै जान पाउनेछन् ।

नेपाल उत्तर कोरियाले मित्रवत मानेकै देश हो । तर, उत्तर कोरियाको दूतावास भने नेपालमा छैन । गत वर्ष उत्तर कोरियाले नेपाल लगायत विभिन्न देशहरुका दूतावास कटौती गरेको थियो । नेपालीले उत्तर कोरियाली जाने भिसा लिन कि बेइजिङ कि दिल्ली जानुपर्ने हुन्छ ।