केन्द्रको सिको गरेर पदका नामका कार्यक्रम फेर्न गर्न प्रधानमन्त्री ओलीको निर्देशन

काठमाडौं । प्रधानमन्त्री केपी शर्मा ओलीले प्रधानमन्त्रीसँग रोजगार जस्ता ठूला पदका नामका कार्यक्रमको नाम परिवर्तन गर्न निर्देशन दिएका छन् ।

सबै मन्त्रालयको वार्षिक प्रगति समीक्षा, चालू आर्थिक वर्षको बजेट र कार्यक्रम कार्यान्वयन योजनाका साथै वर्तमान सरकारको १०० दिनभित्र गरिने मुख्य कामबारे बिहीबार प्रधानमन्त्री तथा मन्त्रिपरिषद्को कार्यालय सिंहदरबारमा भएको प्रस्तुतिपछि सम्बोधन गर्दै उनले यस्तो निर्देशन दिएका हुन् ।

प्रधानमन्त्री ओलीले भने, ‘जनतासँग रोजगार जस्ता नाम राख्ने, केन्द्रको सिको गरेर मुख्यमन्त्रीसँग फलानो कार्यक्रम भनेर आएका छन्, त्यो उपयुुक्त होइन । नयाँपन पनि भएन ।’ उनले युवा र खेलप्रेमीलाई उत्साह दिन कीर्तिपुर रंगशाला स्तरोन्नतिका लागि सम्पूर्ण समय दिएर काम गर्न, पुजीगत खर्च शत प्रतिशत गर्न तथा बेरुजु नहुने गरी काम गर्न निर्देशन दिएका छन् ।

प्रधामन्त्री ओलीले थप निर्देशन दिँदै भने, ‘दसौं राष्ट्रिय खेलकुदलाई भव्य र प्रभावकारी बनाउनका लागि के के गर्नुपर्नेछ आवश्यक प्रस्ताव ल्याउनुस् । खाद्यान्नमा आत्मनिर्भर हुने र बजारमा स्वस्थ्य खाना उपलब्ध हुने वातावरण बनाउनुस् । कृषि उपजलाई निर्यात गर्न सक्ने आधार तय गर्नुस् । कानून मात्रै धेरै बनाइयो भनेर हुन्न । गरिबलाई कानून मात्रै दिएर के काम ? कानुन खान दिदैन । त्यसैले विकासको लक्ष्यलाई केन्द्रमा राख्नुस्, साधनलाई होइन ।’