बीपी प्रतिष्ठानसँग मजदुरहरू रुष्ट, बनाए आन्दोलन परिचालन कमिटी

नेपाल प्रेस

२०८१ साउन ३२ गते ८:०३

धरान । बीपी कोइराला स्वास्थ्य विज्ञान प्रतिष्ठानका पदाधिकारीहरूले आफूहरूलाई एक वर्षदेखि अलमल्याएको भन्दै सुरक्षा श्रमिक र सफाइ श्रमिकहरू रुष्ट बनेका छन् ।

वृद्धि गरेको न्यूनतम पारिश्रमिक नपाएको, हेल्थ कार्ड सुविधा कटौती गरेको, पुराना बाँकी रकम नपाएको र जेठ महिनादेखि मासिक तलब समेत रोक्का गरिएपछि मौखिक र लिखित रूपमा पटक पटक ध्यानाकर्षण गराएको भए पनि समस्याको समाधान नभएपछि श्रमिकहरू प्रतिष्ठानसँग रुष्ट बनेका हुन् ।

बिहीबार प्रतिष्ठान हाताभित्र नेपाल सफाइ कर्मचारी युनियन र नेपाल सुरक्षा श्रमिक ट्रेड युनियनले भेलाको आयोजना गरेर संवादबाट समस्याको समाधान नभएको भन्दै आन्दोलनबाट निकास निकाल्ने संकल्प सहित ३५ सदस्यीय आन्दोलन परिचालन कमिटी गठन गरेको छ ।

बिहीबार बिहान नेपाल यातायात स्वतन्त्र मजदुर संगठनका अध्यक्ष तथा जिफन्ट राष्ट्रिय कमिटी सदस्य भीम ज्वाला राईको अगुवाइमा प्रतिष्ठानका भीसी डा. ज्ञानेन्द्र गिरी, रजिष्ट्रार डा. सूर्य संग्रौला र रेक्टर डा. सञ्जीव शर्मासँग संवाद गरिएको थियो ।

रजिष्ट्रार डा. सूर्य सङ्ग्रौलासँग प्रत्यक्ष भेटेर र अन्यसँग फोन संवाद गरिएको थियो । संवादका क्रममा सबै पदाधिकारीले श्रमिकहरूको समस्या कुनै ठुलो समस्या नभएको आफू सकारात्मक रहेको जनाउँदै अरूका कारणले यो समस्या समाधान नभएको बताएका थिए ।

श्रमिकहरूले अघि सारेका कतिपय समस्याहरू कार्यान्वयन गर्न पर्याप्त कानुनी आधारहरू भएकाले निर्णय गर्न कुनै समस्या नभएको र कतिपय कुराहरू व्यवहारिक हिसाबले पनि व्यवस्थापन गर्न सकिने खालका रहेकाले कुनै समस्या नभएको प्रतिष्ठानका पदाधिकारीहरूको तर्क रहेको थियो ।

प्रतिष्ठानका पदाधिकारीहरुबीचको समन्वयको अभाव र पूर्वाग्रहपूर्ण सम्बन्धका कारण श्रमिकहरूलाई एक वर्षदेखि आलटाल गरिरहेको र पदाधिकारीको कोप भाजनमा श्रमिकहरू परेकाले आन्दोलनको विकल्प नरहेको निष्कर्ष सहित आन्दोलनको तयारी गरिएको मजदुर नेता भीम ज्वाला राईले बताए ।

प्रतिष्ठानका अन्य कर्मचारीहरू सरह सुरक्षा र सफाइ श्रमिकहरूले वर्षौँदेखि उपयोग गर्दै आइरहेको हेल्थ कार्ड सुविधा विना कारण २०८० साउन १ गतेदेखि बन्द गरिदा श्रमिकहरू र तिनका आश्रित परिवारमा गम्भीर असर परेकाले त्यसलाई निरन्तरता दिनु पर्ने माग छन् ।

यस्तै, २०८० साल साउन महिनादेखि लागु हुने गरी नेपाल सरकारले राजपत्रमा प्रकाशित गरी लागु गरेको २ हजा ३ सय बढेको तलब तत्काल उपलब्ध गराउनु पर्ने, केटिएम सेक्युरिटी कम्पनीले प्रतिष्ठानमा ठेक्का सम्झौतामा काम गरेको समयमा श्रमिकहरूले पाउनुपर्ने १ करोड ५६ लाख ३४ हजार ३ सय १३ रुपैयाँ ३६ पैसा श्रमिकहरूलाई उपलब्ध गराउन श्रम अदालतले चार वर्ष अघि गरेको फैसला कार्यान्वयन गर्नु पर्ने माग पनि छ ।

त्यसैगरी श्रम ऐन २०७४ अनुसारका सेवा सुविधाहरू श्रमिकहरूले पाउनु पर्ने लगायतका माग राखेर गत जेठ १५ गते भीसी गिरी सहित सबै पदाधिकारीहरूलाई ध्यानाकर्षण पत्र बुझाइएको र त्यही समयमै समस्या समाधान हुने आश्वासन पाए पनि अहिलेसम्म मागहरूको सम्बोधन नभएपछि आन्दोलनमा जानु परेको सुरक्षा श्रमिकका घोपा सचिव प्रवीण राईले बताए ।

यो साउन महिनाको मासिक तलब आउँदा हाम्रा विषयहरू सम्बोधन भएर आउँछ कि आउँदैन हामी हेर्छौ भीसी लगायतका पदाधिकारीहरूले भन्नु भएजस्तै समस्याको समाधान भए ठिकै छ भएन भने अन्तिम अल्टिमेटम सहित आन्दोलनका कार्यक्रम सार्वजनिक गर्छौँ आन्दोलन परिचालन कमिटीका संयोजक यामकला मग्रातीले बताइन् ।