केन्यामा आयो मूर्ति विवाद : पदक विजेता खेलाडीको कुरूप मूर्ति बनाउनेलाई जेल हाल्न माग

काठमाडौं । केहि वर्ष अगाडी नेपालका पर्यटकीय क्षेत्रहरूमा बनाइएका मूर्तिहरू कुरूप भएको तथा मूर्तिको कला पनि नभएको भन्दै व्यापक आलोचना भएको थियो ।

अहिले यस्तै आलोचना अफ्रिकी देश केन्यामा भएको छ । भएको के हो भने केन्या हालसालै सकिएको पेरिस ओलम्पिकमा सबैभन्दा धेरै पदक जित्ने अफ्रिकी देश बन्यो ।

चार स्वर्ण, दुई रजत र पाँच कांस्य जितेर केन्याले ११ पदक हात पार्‍यो । यो पदक तालिकामा १७ औँ स्थान हो भने अफ्रिकामा सबैभन्दा धेरै ।

त्यसकै सम्मानमा पदकधारी खेलाडीहरूको मूर्ति बनाउने कुरा गर्‍यो केन्याको एल्डोरेटको स्थानीय सरकारले । केन्याकी चर्चित खेलाडी फेथ किपयिगोन र इलिउड किपचोजको मूर्ति बनाउने निर्णय भयो ।

मूर्ति बनाइयो पनि । तर, उनको मूर्ति उनलाई नै बेइज्जत गर्ने खालको कुरूप भयो । सामाजिक सञ्जालमा व्यापक आलोचना भयो । र, बिहीबार मूर्तिहरू हटाइयो ।

एक जनाले मूर्तिबारेमा आलोचना गर्दै मूर्ति बनाउनेलाई खेलाडीको अपमान भएको भन्दै जेल हाल्न आग्रहसमेत गरेको बीबीसीले उल्लेख गरेको छ ।