थामे अपडेट : ४० घरको बस्तीमा बाढी पस्यो, एक होस्टेल र ४ घर बगे
४ का वडाध्यक्ष भन्छन्- मानवीय क्षति रोक्न टेलिकमलाई सूचना दिन भनिसक्यौं
२०८१ साउन ३२ गते १५:४१
विराटनगर । सोलुखुम्बुको खुम्बु पासाङल्हामु गाउँपालिका-५ थामे गाउँमा आएको बाढीले केही घर बगाएको छ ।
हिम ताल फुटेर बाढी आएको आशंका गरिए पनि यकिन भइसकेको छैन । दूधकोशी नदीमा आएको बाढीले ४ वटा घर र एउटा होस्टेल बगाएको प्रहरीले जनाएको छ । थामेमा ४० घरको बस्ती भएपनि अहिले सबै घरमा परिवार नरहेको प्रहरीले जनाएको छ ।
इलाका प्रहरी कार्यालय नाम्चेका प्रहरी निरीक्षक रोशन खड्काले अहिलेसम्म मानवीय क्षतिको विवरण नआएको बताए । घटनास्थलमा प्रहरी पुगेको र क्षति विवरण संकलन भइरहेको जिल्ला प्रहरी कार्यालय सोलुखुम्बुले जनाएको छ ।
यो पनि पढ्नुहोस् – सोलुखुम्बुको खुम्बु पासाङल्हामुमा बाढी, हिम ताल फुटेको आशंका (भिडिओ)
जिल्ला प्रहरी कार्यालय सोलुका प्रमुख प्रहरी नायव उपरीक्षक द्वारिकाप्रसाद घिमिरेले थामे गाउँमा ठूलो बाढी आएको बताए ।
उनले भने, ‘अहिले भर्खरै प्रहरीको टोली पुगेको छ । घटनाको बारेमा विस्तृत विवरण आउन बाँकी छ ।’
बाढी के कारण आयो भन्ने अहिलेसम्म पुष्टि भइनसकेको उनको भनाइ छ ।
प्रकाशित: २०८१ साउन ३२ गते १५:४१
प्रतिक्रिया
सम्बन्धित खवर
