‘बिस्तराले पोल्यो’ गाएर माफी मागेकी शान्तीश्रीको नयाँ गीत– ‘जवानीले पोल्यो’, यो पनि उस्तै हट

काठमाडौं । गायिका शान्ती श्री परियाले आफ्नो एक गीतलाई तिव्र विवाद उत्पन्न भएपछि १५ दिन अगाडि मात्रै सामाजिक सञ्जालबाट दर्शकसँग क्षमायाचना गरेकी थिइन् ।

उनले गाएको ‘बिस्तराले पोल्यो…’ बोलको गीत र भिडिओ उछृङ्खल भएको भन्दै आलोचना भएको थियो ।

त्यसबेला विज्ञप्ति नै जारी गरेर परियारले भनेकी थिइन्, ‘ म लोक तथा दोहोरी गीत प्रतिष्ठान नेपालको केन्द्रीय सदस्यको नाताले मसँग सम्वन्धित गीतले प्रतिष्ठानको प्रतिष्ठाप्रति र आदरणीय शुभचिन्तकहरुप्रति आँच पुग्न गएको आभास भएको हुँदा क्षमाप्रार्थी छु । साथै आगामी दिनमा शब्द, संगीत, छनोट गरी गाउने वाचा गर्दछु ।’

तर, उनको यो वाचा १५ दिन पनि टिकेन । दुई दिनअघि शान्तिश्रीको नयाँ गीत रिलिज भएको छ, जसको बोल छ, जवानीले पोल्यो…गीतको शब्ददेखि भिडिओ र कोरियोग्राफी पनि अघिल्लो भन्दा खासै फरक छैन । मोडल पनि उनै बोलाखे छिन् । यसमा पनि उनको पहिरन उही छ र उत्तिकै सेक्सी नृत्य गरेकी छन् ।

यो गीतका गीतकार र संगीतकार तथा भिडिओ निर्देशक भने फरक छन् । गीतका शब्द तुलाराम लामिछानेले लेखेका हुन् भने पवन परियारले संगीत दिएका हुन् । भिडिओको निर्देशन र कोरियोग्राफी सुरेश पाण्डेको रहेको छ । अघिल्लो गीतजस्तो ‘क्याची’ भने यो गीत छैन ।