प्रचण्डसामु जनार्दनले भने- नेतृत्वको वरिपरिबाट मैले पार्टी फुटाउँदैछ भनेर बदनाम गरिँदैछ (भिडिओ)

काठमाडौं । नेकपा माओवादी केन्द्रका उपमहासचिव जनार्दन शर्माले पार्टी नेतृत्वको वरिपरिबाट आफूलाई पार्टी फुटाउँदैछ भनेर आरोप लगाइएको बताएका छन् ।

नेकपा माओवादी काठमाडौं-रुकुम पश्चिम सम्पर्क समितिको दोस्रो सम्मेलनलाई सम्बोधन गर्दै उनले नेतृत्वकै वरिपरिबाट आफूले पार्टी फुटाउँदैछ भनेर आरोप लगाइएको बताए ।

उनले अध्यक्ष प्रचण्डसामु भने, ‘तपाईंहरुले मलाई दलाल जस्तो देख्नुहुन्छ ? म यो पार्टी फोर्ने जस्तो देख्नुहुन्छ ? तर, त्यो आरोप मैले आज खेपिरहेको छु । पार्टीको उच्च तह र नेतृत्वको वरिपरिबाट देशभरि मैले पार्टी फुटाउँदैछ भनेर बदनाम गरिँदैछ ।’

नेता शर्माले आफूलाई मनोगत ढंगले आरोपित गरेर सत्यलाई उल्ट्याउने प्रयत्न गरेको बताए ।

उनले आफूले गरेको प्रश्नमा कुनै पूर्वाग्रह नभएको बताए । आफूलाई पार्टी बनाउने हुटहुटी रहेको बताउँदै नेता शर्माले पार्टीमा इमानदार बन्न पाइँदैन भनेर प्रश्न गरे ।

उनले भने, ‘मैले उहाँलाई भनेको छु तपाईंलाई हटाएर मलाई अध्यक्ष हुनुछैन, तर यो पार्टी आन्दोलन बनाउने हो भने छलफल चाहिन्छ भनेर छलफलको विषय राखेको हो । प्रस्तावमा छलफल हुँदैछ । नेतृत्वलाई स्थापित गर्न कुरा राख्दा मैले अनेक आरोप खेप्नुपर्ने ?’

नेता शर्माले आफू १४ वर्षको उमेरदेखि यो आन्दोलनमा लागेको बताउँदै अर्को पार्टीमा जानेबारे कल्पना गर्न नसकिने बताए ।