यस वर्षकाे दिव्यविक्रम नेम्बाङ स्मृति सम्मान भारतका राजा पुनियानीलाई दिइने

काठमाडौँ । दिव्यविक्रम नेम्बाङ स्मृति सम्मान यो वर्ष भारतका राजा पुनियानीलाई प्रदान गरिने भएको छ । राजनीतिज्ञ तथा साहित्यकार नेम्बाङको नाममा स्थापना भएको दिव्यविक्रम नेम्बाङ स्मृति प्रतिष्ठानका अध्यक्ष नन्दहाङ नेम्बाङका अनुसार भारत दार्जिलिङ सकुनामा पुनियानीलाई यो पुरस्कार प्रदान गरिनेछ ।

नेम्बाङको पाँचौं स्मृति दिवसको अवसर पारेर यही भदौ १४ मा पुनियानीलाई झापाको बिर्तामोडमा सम्मान गरिनेछ । कवि, अनुवादक तथा चिन्तकको पहिचान बनाएका पुनियानी नेपाली, हिन्दी, बंगाली तथा अंग्रेजी भाषामा साहित्य कर्म गर्ने अनुहार हुन् ।

पुनियानी अगाडि यो सम्मान प्रकाश थाम्सुहाङ, कृष्ण बराल र उपेन्द्र सुब्बाले पाइसकेका छन् । सम्मानको राशी ३० हजार रुपैयाँ रहेको छ ।

साहित्यकार दिव्यविक्रम नेम्बाङ प्रजातान्त्रिक योद्धा पनि थिए । निर्वासनको क्रममा उनले तेस्रो आयामको मुखपत्र ‘फूल पात पत्कर’ प्रकाशन गरेका थिए ।