कैलालीमा म्याजिक र मोटरसाइकल ठोक्किँदा एकको मृत्यु, तीन जना घाइते

कैलाली । कैलालीमा म्याजिक र मोटरसाइकल ठोक्किएर ठोक्किँदा एक जनाको मृत्यु भएको छ भने थप तीन जना घाइते भएका छन् ।

मोहना पुल अत्तरिया ६ लेन सडकको गेटा अस्पताल नजिक म १ ज १६१ नम्बरको म्याजिक र से ६ प ८४२३ नम्बरको मोटरसाइकल एक आपसमा ठोक्किँदा मोटरसाइकल चालक कञ्चनपुरको कृष्णपुर नगरपालिका–२ वाणीका विश्राम चौधरीको मृत्यु भएको जिल्ला प्रहरी कार्यालय कैलालीका प्रहरी निरीक्षक लोकेन्द्रसिंह कार्कीले जानकारी दिए ।

दुर्घटनामा गम्भीर घाइते भएका उनको उपचारको क्रममा सेती प्रादेशिक अस्पतालमा मृत्यु भएको हो ।

मोटरसाइकल पछाडि सवार रहेका धनगढी उपमहानगरपालिका–२ का रामप्रसाद चौधरी घाइते भएका छन् । उनको माया मेट्रो अस्पतालमा उपचार भइरहेको छ । यस्तै म्याजिकमा सवार २ जना घाइते भएका छन् । घाइते हुनेमा भीमदत्त नगरपालिका–६ की ९ वर्षीया अविशा श्रेष्ठ र ५ वर्षीय आयन श्रेष्ठ रहेका छन्। उनीहरुको अवस्था मध्यम रहेको छ ।

म्जाजिकमा ८ जना सवार थिए । ५ जना गन्तव्यमा गइसकेका छन् ।