झापामा नेकपा एसका ७० नेता-कार्यकर्ता एमालेमा फर्किए

झापा । झापामा नेकपा एकीकृत समाजवादीका अधिकांश नेता नेकपा एमालेमा प्रवेश गरेका छन् । नेकपा एस राष्ट्रिय परिषद् सदस्य राजेन्द्र दाहाल, मणि भण्डारी, दमक नगर कमिटीमा पूर्वअध्यक्ष महेश घिमिरे, अध्यक्ष रोशन भण्डारीसहितका नेता-कार्यकर्ता मूलघर फर्किएका हुन् । उनीहरूले पत्रकार सम्मेलन गरेर नेकपा एस त्यागेको घोषणा गरे ।

अनेरास्ववियू दमक क्याम्पस कमिटी, अखिल फोर्स दमकको सिंगो कमिटी एमालेमा समाहित भएको छ । नेकपा एमालेका केन्द्रीय सदस्य रोमनाथ ओलीले नवप्रवेशी नेता तथा कार्यकर्तालाई स्वागत गरेका छन् ।

एमालेको नेतृत्वमा मात्रै वामपन्थीको एकता सम्भव भएको नवप्रवेशी दाहालको भनाइ थियो ।

एमालेका केन्द्रीय सदस्य दीपक कार्कीले नवप्रवेशी सबै नेता कार्यकर्ताहरुलाई यथोचित जिम्मेवारी दिइने बताए । पार्टी प्रवेश कार्यक्रममा एमाले झापाका उपाध्यक्ष शिव ढुंगेलले मुलुकको कम्युनिष्ट आन्दोलनको मूल प्रवाहमा समाहित हुन सबैलाई आव्हा नगरे ।

नेकपा एस छाडेर आएका दमक नगर कमिटीका पूर्वअध्यक्ष महेश घिमिरेले पार्टी सदस्यता नवीकरणलाई अघि बढाउने र मिसन ८४ सफल बनाउने प्रतिबद्धता जनाए ।

दमक र कमलबाट ७० जना नेकपा एसका नेता तथा कार्यकर्ता एमालेमा फर्किएको जिल्ला कमिटीले जनाएको छ ।