सांसद राजन दाहालमाथि आर्थिक अनियमितता र लेबीमा भ्रष्टाचारको आरोप, पार्टी इन्चार्जले गरे यस्तो सर्कुलर

काठमाडौं । नेकपा माओवादी केन्द्रका सांसद तथा सिन्धुलीका तत्कालीन जिल्ला इन्चार्ज लेखनाथ दाहाल ‘राजन’ माथि आर्थिक अनियमितताको आरोप लागेको छ । सिन्धुली जिल्ला पार्टी कार्यालयको भवन निर्माण गर्दाको आर्थिक अनियमितता गरेको आरोप लागेको हो ।

जिल्ला समन्वय समिति सिन्धुलीको जिल्ला इन्चार्ज बुद्धिमान माझीको अध्यक्षतामा बसेको बैठकले हालसम्म पनि भवन निर्माणको आयव्यय विवरण नबुझाएकाले पार्टी कमिटीमा परिपत्र गरिएको हो ।

इन्चार्ज माझीले पठाएको परिपत्रमा भनिएको छ, ‘जिल्ला पार्टी कार्यालयको भवन निर्माणको आय व्याय प्रस्तुत गर्न यसअघिको जिल्ला समन्वयको निर्णय अनुसार तत्कालीन जिल्ला इन्चार्ज केन्द्रीय सदस्य लेखनाथ दाहाललाई बारम्बार अनुरोध र ताकेता गरियो । भवन निर्माण कार्यक्रको क्रममा पनि खाता सञ्चालक गणेश रत्नलाई कार्यालयमा बोलाएर आयव्यय प्रस्तुत गर्न आग्रह गरियो, सुनुवाइ भएन । गणेश रत्नको भनाइको आधारमा भवन निर्माणबाट बाँकी रकम करिब ४०-४५ लाख जनसेवा फाउन्डेसनको नाममा जम्मा गरेको बुझिएको छ । हालसम्म भवन निर्माको आय व्याय पार्टी कमिटीलाई प्राप्त भएको छैन ।’

जनसेवा फाउन्डेसनकी अध्यक्ष दीपा बोहरा दाहाल राजन दाहालकी श्रीमती हुन् । दीपा सुनकोशी गाउँपालिका अध्यक्षसमेत हुन् ।

कमलामाई नगरपालिका-६ स्थित २ मा ७० लाख हाराहारीमा १२ धुर जग्गा किनेर भवन बनाइएको छ । स्थानीय व्यापारीले रड, सिमेन्ट, गिट्टी, बालुवा सहयोग गरेको उक्त भवनमा ज्यामीको ज्यालाका लागि संकलित रकम र भएगरेको खर्चको हिसाब सार्वजिनक गर्न गत वर्ष पनि आवाज उठेको थियो ।

पार्टी अध्यक्ष प्रचण्डले उद्घाटन गरेको उक्त भवन निर्माणमा दुई करोड बढी खर्च लागेको अनुमान छ । चार तले उक्त भवनमा १४ वटा कोठा, एउटा हल र एक किचन छ । भवन बनाइसकेको दुई वर्ष बित्न लाग्दासम्म आम्दानी खर्च विवरण सार्वजनिक गर्न आलटाल गरेपछि नेता कार्यकर्ताले दाहालको आलोचना गरिरहेका छन् ।

दाहालमाथि पार्टी इन्चार्ज नहुँदा पनि सिन्धुलीमा आफूखुसी समानान्तर कमिटी चलाएको आरोप छ । दाहालले इन्चार्जसँग परामर्शविना आफू अहिले इन्चार्ज नहुँदा पनि आफूखुसी बैठक राखेर लेवि समेत उठाउने गरेको बताइन्छ ।

बैठकले पार्टीका संगठित सदस्यता विवरण र लेबी बुझाउन यसअघि जिल्ला पार्टीको बैठकले गरेको परिपत्र अनुसार लेबी प्राप्त नभएकाले आगामी भदौं मसान्तभित्र बुझाउन कडाइ निर्देशन समेत दिएको छ ।

यसअघि पनि माओवादीले चलाएको जनतासँग माओवादी कार्यक्रममा पनि जिल्ला इन्चार्ज महेश्वर दाहालसँगको टकरावको कारणले भाँडभोलो गरेका थिए । दाहाल गएको निर्वाचनमा उपमहासचिव हरिबोल गजुरेलको फिक्स भएको टिकट फुत्काएर सिन्धुलीबाट निर्वाचित भएका थिए ।

यो पनि पढ्नुहोस्-

सिन्धुलीमा महेश्वरविरुद्ध राजन दाहालको एम्बुस, सांसद पत्नीले मञ्चबाट पुष्पगुच्छा फालेपछि माओवादीमा भाँडभैलो

अमरेश सिंहले माओवादी सांसद राजन दाहाललाई ‘गुण्डागर्दी’ स्मरण गराउनुको यस्तो रहेछ रहस्य (भिडिओ)