अष्ट्रेलियाबाट लिङ्देनको प्रश्न- ३५ वर्ष शासन गरेका ठूला दललाई देश बनाउन कसले रोक्यो ? (भिडिओ)

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले ०४६ सालको राजनीतिक परिवर्तनपछि राजा ज्ञानेन्द्रले १८ महिनामात्रै प्रत्यक्ष शासन चलाएको बताएका छन् । त्यो १८ महिनाबाहेक कांग्रेस, एमाले र माओवादीले नै निरन्तर ३५ वर्ष शासन गरेको भन्दै तर पनि देशमा थुप्रै समस्या रहेको उनको जिकिर छ ।

प्रवासी नेपाली एकता समाज अष्ट्रेलिया राज्य समितिले एडिलेडमा आयोजना गरेको अनुतरक्रिया कार्यक्रममा लिङदेनले भने, ‘यहाँ आएर पनि हामी राजालाई गाली गर्छौँ । ०४६ सालको राजनीतिक परिवर्तनपछि राजा ज्ञानेन्द्रले प्रत्यक्ष शासन चलाएको १८ महिनाबाहेक बाँकी समय नेपालमा भएका ठूलो दल र तीनै नेताहरूले देश चलाएको होइन ?’

‘प्रजातन्त्र, लोकतन्त्र, गणतन्त्रमा तपाईंहरूले नै भगवान् मानेका कांग्रेस एमालेले देश चलाएको होइन ?’ उनको प्रश्न थियो ।

लिङदेनले थपे, ‘कांग्रेस, एमालेले शासन चलाएको साढे तीन दशक चानचुने समय होइन । यो अवधिमा हाम्रा युवाहरूले दुबई, कतार, मलेसिया बनाए । तर, हाम्रो देश बन्न सकेन । अब राजालाई गाली गरेरमात्रै पुग्छ त ? कांग्रेस, एमाले, माओवादीले देश बनाएकै हो त ? एकचोटि सम्झनुस् । विमानस्थलमा ताली लागेर देश छाड्ने युवायुवतीहरू देखिन्छन्, यो ३५ वर्षमा कांग्रेस, एमाले, माओवादीलाई देश बनाउन कसले रोक्यो ?’

पानस अष्ट्रेलियाको अधिवेशनका लागि अष्ट्रेलिया पुगेका लिङेनसँगै राप्रपा कोशी संसदीय दलका नेता भक्ति सिटौला, राप्रपा विदेश विभाग प्रमुख आनन्द अधिकारी, केन्द्रीय सदस्य हिक्मतजंग कार्की पनि पुगेका थिए ।