सुदूरपश्चिमको प्रदेश राजधानी दिपायल बनाउन रास्वपा डोटीले मुख्यमन्त्रीलाई बुझायो ज्ञापन

डोटी । सुदूरपश्चिम प्रदेशको राजधानी दिपायल हुनुपर्ने माग राख्दै राष्ट्रिय स्वतन्त्र पार्टी (रास्वपा)ले सुदूरपश्चिम प्रदेश मुख्यमन्त्री कमलबहादुर शाहलाई ज्ञापनपत्र बुझाएको छ ।

प्रदेश राजधानी डोटीमा कायम गर्न माग गर्दै डोटीका प्रमुख जिल्ला अधिकारीमार्फत मुख्यमन्त्रीलाई ज्ञापनपत्र बुझाइएको रास्वपाका जिल्ला संयोजक केशवबहादुर बलायरले जानकारी दिए ।

देशको समानुपातिक विकास गर्न साविकका ५ वटा विकास क्षेत्रको सदरमुकाम आन्तरिक सुरक्षा, भूगोल, अन्तर्राष्ट्रिय सीमा मापदण्डअनुसार पर्ने ठाउँलाई तोकिएको तर संघीयता आएपछि प्रदेश राजधानी तोक्ने क्रममा डोटीलाई अन्याय भएको ज्ञापनपत्रमा उल्लेख छ ।

‘तराई आफैंमा उर्वर भूमि हो, यदि पहाडबाट बसाइसराइ नरोकिने हो र पुँजी पलायन हुँदै जाने हो भने पहाडका गाउँहरु खाली हुनेछन्, कतिपय गाउँबस्ती खाली भइसकेका छन्’, ज्ञापनपत्रमा भनिएको छ, ‘तराईमा व्यापक रुपमा जंगल अतिक्रमण र मापदण्डविपरीत घर लगाउँदै जाने हो भने भविष्यमा ठूलो खाद्य संकट आउने संकेत देखिएको छ ।’

त्यसैले दिपायल राजधानीको विषयमा पुनर्विचार गरिनुपर्ने माग गरिएको छ । हाल कायम भएको सुदूरपश्चिम प्रदेशको राजधानी गोदावरीको व्यापक विवाद भएको ज्ञापनपत्रमा उल्लेख छ ।

साविकको सुदूरपश्चिमाञ्चल विकास क्षेत्रलाई सुदूरपश्चिम प्रदेश बनाइएको थियो । सुदूरपश्चिमाञ्चल विकास क्षेत्रको सदरमुकाम दिपायल भए पनि तत्कालीन शेरबहादुर देउवा नेतृत्वको सरकारले २०७४ साल माघ ३ गते सुदूरपश्चिम प्रदेशको अस्थायी मुकाम कैलालीको धनगढी तोकेको थियो ।

पछि २०७५ असोज १२ गते सुदूरपश्चिम प्रदेशसभाको दुई तिहाइ बहुमतले कैलालीको गोदावरी नगरपालिका- २ र ४ मा प्रदेश राजधानी तोकेको थियो, तर हालसम्म उक्त स्थानमा राजधानीका लागि कुनै संरचना बनेका छैनन् ।

दिपायलमा भने साविकका क्षेत्रीय निर्देशनालयका भवनहरु प्रयोगमा नआउँदा जीर्ण बन्दै गएका छन् ।