सिके राउतलाई बाबुरामको सुझाव- मधेशको मात्रै होइन, नेपालको नेता बन्नुस् (भिडिओ)

काठमाडौं । नेपाल समाजवादी पार्टीका अध्यक्ष डा. बाबुराम भट्टराईले जनमत पार्टीका अध्यक्ष डा. सिके राउतलाई मधेशको मात्रै नभएर नेपालको नेता बन्न सुझाव दिएका छन् ।

अध्यक्ष राउतको आत्मकथा ‘वैरागदेखि बचावसम्म’ लोकार्पण समारोहमा बोल्दै अब सिंगो नेपालको नेता बन्न सुझाएका हुन् ।

उनले भने, ‘तपार्ईंले मधेशको मात्रै नेता हुने होइन, तपाईं त अब नेपालको नेता बन्नुपर्यो । नेपालको पुरानो शासकले नेपाली नै बन्न दिएनन् नि । नेपाली बन्न नदिएकाले न तपाईं मधेशी बन्नुभएको हो ।

राजनीतिमा पढेलेखेका नैतिकवान मान्छेहरु नआएसम्म देश नबन्ने बताए ।

उनले भने, ‘हाम्रो जस्तो जटिल भूराजनीति भएको जुन ठाउँ छ । यहाँ विभिन्न शक्तिहरु खेल्ने कोशिस त गरिहाल्छन् नि । त्यो स्वभाविक हो । त्यसमा अरुलाई दोष दिनु हुँदैन । जहाँ पनि हुन्छ, अहिले पनि भइरहेको छ । राजनीतिमा पढेलेखेका मान्छे, सादगी जीवन बिताउने मान्छेहरु र नैतिकवान मान्छेहरु नआउने हो भने देश बन्दैन ।’

चुनाव जित्ने सरकारमा गइहाल्ने गरेर देश नबन्न उनको तर्क छ ।

उनले थपे, ’राणाको कालमा पनि भएको थियो, पञ्चायत कालमा पनि भएको थियो । कांग्रेस र एमालेको पालोमा पनि भएको थियो र अहिले पनि भइरहेको छ । साँच्चै नै आधारभुत संरचनागत रुपान्तरण गर्ने, जुन देशका उत्पीडित वर्ग, जाति, क्षेत्र, लिङ्ग र समुदायका जनताको मुक्तिसहित देशलाई समृद्ध बनाउने हो भने सक्षम मान्छे देशको नेतृत्व तहमा जानुपर्छ । सँगै इमान्दारिता चाहिन्छ।’