सिटीको जितमा हालान्डको ह्याट्रिक

हेटौँडा । एर्लिंग हालान्डले इङलिस प्रिमियर लिगको २०२४-०२५ सिजनको दोस्रो चरणको खेलमा पहिलो ह्याट्रिक पूरा गरेपछि यो वर्ष बढुवा भएको इप्सविच टाउनलाई लाई ४-१ ले  पराजित गर्दै म्यान्चेस्टर सिटिले सानदार जित दर्ता गरेको छ ।

डिफेन्डिङ च्याम्पियन सिटिले इस्विचसङ्गको खेलमा अप्रत्याशित पहिलो गोल खान पुगेको थियो । इस्विचले खेलको सातौँ मिनेटमा टाउनका सामी स्माडिक्सको गोल मार्फत सुरुवाती अग्रता दिलाएका थिए ।

तर खेलको १२ औँ मिनेटमा हालान्डले पेनाल्टी मार्फत गोल गर्दै सिटीलाई बराबरी बनाए । त्यसको दुई मिनेटमै डि ब्रुएना र ब्रुएनाले गोल गरेको दुई मिनेटको अन्तरालमा हालान्डले गोल गर्दै पहिलो हाफमा सिटिलाई ३-१ को अग्रता दिलाए ।

दोस्रो हाफको ८८ औँ मिनेटमा हालान्डले तेस्रो गोल गर्दै यो सिजनमा आफ्नो पहिलो ह्याट्रिक पूरा गर्दा सिटिले खेल ४-१ अन्तरले जित्यो । जारी सिजनमा दुई खेलमा हालान्डको यो चौथो गोल हो । जितसँगै सिटी अंक तालिकाको शीर्ष स्थानमा उक्लिएको छ । उसको दुई खेलबाट ६ अंक भएको छ ।