दुई वर्षभित्र एमालेभन्दा ठूलो पार्टी बन्न नेकपा एसको बैठकमा यस्तो छ झलनाथको प्रस्ताव (भिडिओ)

काठमाडौं । नेकपा एकीकृत समाजवादीका सम्मानित नेता झलनाथ खनालले बढीमा दुई वर्षभित्र एमालेभन्दा ठूलो पार्टी बन्न सकिने दाबी गरेका छन् । उनले त्यसका लागि कम्तिमा एक संगठित सदस्यले अर्को एक सदस्य थप्नुपर्ने बताएका छन् ।

पार्टीको महाधिवेशनपछि आयोजित पहिलो केन्द्रीय कमिटी बैठकलाई आइतबार सम्बोधन गर्दै नेता खनालले संगठनको क्षेत्रमा पछिल्लो समय एमालेले अपनाएको प्रणाली सही रहेको समेत बताए ।

बैठकलाई सम्बोधन गर्दै खनालले भने, ‘एमालेकै अध्ययन गरेको थिएँ मैले, त्यहाँ साढे ३ लाख सदस्य छन् । हाम्रो नेकपा एसका डेढ लाख सदस्य छन् । अब एकजनाले कम्तिमा एक सदस्यमात्र थप्यौं भने पनि ३ लाख हुन्छ । हामी त्यो अवस्थामा अहिलेका ठूला भन्ने जुनसुकै पार्टीलाई पनि चुनौती दिनेगरी बलियो हुनेछौं । तर त्यसका लागि सबैले मेहनत गर्नुपर्छ ।’

सम्मानित नेता खनालले अब नेकपा एसले केन्द्रीय सदस्यहरुको कार्यविभाजन गर्दा नेकपा एमालेले जस्तैगरी निर्वाचन क्षेत्रलाई केन्द्रित बनाएर जिम्मेवारी दिनुपर्ने समेत बताए । उनले १८ जना पदाधिकारीको चयन केन्द्रीय सदस्यहरुको बीचमा मतदानबाट होइन सर्वसम्मतिले गर्नुपर्ने धारणा राखे ।

खनालले नेकपा एसमा केन्द्रीय सदस्यहरु कार्यक्षेत्रमा नजाने, विदेश घुमेर यसो बैठकका बेला झुल्किने र मत तथा सदस्य बढाउन कतै पनि प्रयास नगर्ने प्रवृति देखिएको बताए । खनालले लोकतान्त्रिकरणका नाममा एमालेमा प्रत्यक्ष निर्वाचन गर्दा २ पटक विभाजन भएको भन्दै नेकपा एसमा प्रत्यक्ष निर्वाचनभन्दा सहमतिबाट नेतृत्व चयनमा जोड दिनुपर्ने बताए ।