नेपथ्य अमेरिका शृंखला २०२४: डालासमा दर्शकको भव्य साथ

डालास (टेक्सास) । ‘टिकट सबै बिक्री भइसकेको छ’, कन्सर्टको दिन बिहान अनलाइनबाट टिकट काट्न खोज्ने दर्शकहरूले अनलाइन टिकट व्यवस्थापन गर्ने ‘लाइभ नेसन’को साइटमा यस्तो सन्देश देखे । उता चार हजार दर्शक क्षमताको टोयोटा म्युजिक फ्याक्ट्रीमा नचिताएको उपस्थिति देखेर हेर्न जाने सबै चकित परिरहेका थिए ।

‘अदभुत !’, आश्चर्य मान्दै ईशु पोखरेल भन्दै थिइन्, ‘अमेरिकाको एउटै स्थानमा एकै छतमुनि एकसाथ यति धेरै नेपाली देखेकै आजसम्मकै मेरो पहिलो अनुभव हो ।’

युनिभर्सिटी अफ टेक्सासकी विद्यार्थी ईशु ६ वर्षको उमेरमा आफ्ना अभिभावकसाथ अमेरिका आएकी हुन्, जो शनिबार आमाका साथ कन्सर्ट हेर्न पुगेकी थिइन् ।

‘आमामात्र होइन, मामाघरका हजुरआमालाई समेत मन पर्ने ब्यान्ड हो नेपथ्य’, उनले भनिन्, ‘नेपाली कार्यक्रमहरूमध्ये आजसम्मकै सबैभन्दा उत्कृष्ट अनुभव मेरो यही बन्न पुग्यो ।’

निर्धारित समयमै मञ्चमा बज्न थालेको नेपथ्यका लोक-रक भाकाहरू लगातार दुई घन्टासम्म निरन्तर रहेको थियो । गीतको तरङ्गसँगै विशाल हलभित्रको भीडमा मानिसका टाउकाहरू पनि लहरजस्तै बगेका देखिन्थे ।

‘कोशीको पानी यो जिन्दगानी’, ‘शीरफूल शीरैमा’, ‘नैनताल’ र ‘पचासै वर्षमा’ जस्ता नयाँ गीतहरूको समेत प्रस्तुति रहेको कार्यक्रममा, ‘छेक्यो छेक्यो’, ‘जोमसोमे बजार’, ‘रेशम’, ‘तालको पानी’ लगायत नेपथ्यका सार्वकालिक हिट गीत पनि प्रस्तुत गरिएको थियो । नयाँ पुराना सबै गीतमा गायक अमृत गुरुङलाई पूरा हलले कोरसले झैँ साथ दिएको थियो ।

‘मानिसहरू हरेक कुरामा पुस्तापिच्छे आउने अन्तर (जेनरेसन ग्याप)को कुरा गर्छन्’, ईशुले थपिन्, ‘तर राम्रा कुराहरू कुनै कालखण्डमा नबाँधिएर एक पुस्ताबाट अर्को पुस्तामा हस्तान्तरण पनि हुने गर्छ भन्ने कुराको प्रमाण यो कन्सर्ट बन्न पुगेको छ ।’

कन्सर्ट हेर्नकै निम्ति पाँच घन्टा लामो मोटर यात्रा गरेर सान एन्टोनियोदेखि आएका रोशनलाल श्रेष्ठले आफ्नो अनुभव यसरी पोखे, ‘संगीत, हलभित्रको माहोल प्रभावकारी बनाउन दृश्यहरूको प्रस्तुति, प्रत्येक क्षणको सदुपयोग, नेपथ्यका सदाबहार गीतहरूदेखि लिएर गायकले दिने मर्मस्पर्शी सन्देशसम्म सबै थोकको गजब समायोजन अनुभव गर्न पाइयो । मेरा निम्ति सिंगो प्रस्तुति एउटा अविस्मरणीय भव्य अनुभव बन्यो ।’

कन्सर्ट हेर्नकै लागि राजधानी वासिङ्टन डीसीदेखि आएका सौरभ पाण्डे जस्ता दर्शक पनि थुप्रै थिए । नेपथ्यको कन्सर्ट हेर्न गरिने खर्चको एकएक पैसा चुक्ता हुने गरेको दाबी गर्ने सौरभले केही दिनमै मेरिल्यान्डमा आयोजना हुने नेपथ्य कन्सर्ट पनि हेर्न जाने सुनाए ।

‘कति चुस्त अनि कस्तो गजबको प्रस्तुति’, हलका प्रोडक्सन म्यानेजर जिम्मी निकोलाइडिसले प्रतिक्रिया दिए, ‘दर्शकहरूको उत्साह यति प्रभावकारी थियो कि यो आयोजनाकै एउटा पाटो बन्न पाएकामा मलाई गौरव महसुस भएको छ । नेपाली कलाकारको प्रस्तुति यति भव्य र दर्शक यति सभ्य होलान् भनेर मैले अनुमान गरेको थिइनँ ।’

कन्सर्टमा मुख्य गायक अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।

डालासको कन्सर्टमा स्थानीय आयोजकहरूले गरेको लामो समयदेखिको तयारी पनि उत्तिकै प्रभावकारी रूपमा झल्किन्थ्यो । ‘हामीले गरेको मेहनतको चिताएभन्दा राम्रो परिणाम प्राप्त भएको छ’, डालासका आयोजक अनि यो वर्ष ब्यान्डको सिंगो अमेरिका यात्राकै संयोजक विपीन थकालीको प्रतिक्रिया थियो, ‘यति भव्य कन्सर्टमार्फत दर्शक र नेपथ्यको बीचमा साँघु बन्न पाउँदा हामी स्वयंले पनि गर्व महसुस गर्न थालेका छौं ।’

आयोजक टोलीकै निश्चल बज्राचार्यले विपीनको कुरामा सहमति जनाउँदै थपे, ‘यो कार्यक्रमले नेपाली कार्यक्रम आयोजनाका लागि नयाँ मापदण्ड खडा गरिदिएको छ ।’

नेपथ्यको अमेरिका यात्राको अघिल्ला चार कन्सर्ट भव्य रूपमा सम्पन्न भएपछि अब पाँचौं प्रस्तुतिका लागि नेपथ्य न्यूयोर्क प्रस्थान गर्नेछ । यसअघि पनि पटकपटक आफूलाई यस शहरमा भव्यतासाथ उभ्याइसकेको नेपथ्यले यसपाला म्यानहटनकै फिफ्टी सिक्स्थ स्ट्रिटस्थित ‘टर्मिनल फाइभ’ हलमा कन्सर्ट प्रस्तुत गर्नेछ । त्यहाँ ८ वर्षको अन्तरालपछि अगस्त ३० तारिखमा नेपथ्य साँझ आयोजना हुनेछ । पहिलो पटक प्रस्तुत हुन लागेको यो हलमा तीन हजार दर्शक अटाउने क्षमता छ ।

न्यूयोर्कपछि मेरिल्यान्ड र अन्त्यमा पेन्सिलभेनियाको ह्यारिसबर्गमा प्रस्तुत गरेपछि यस वर्षको शृंखलाबद्ध यात्राले विश्राम लिनेछ ।
अमेरिकाका सबैजसो कन्सर्टमा दर्शकहरूले अनलाइनबाटै सोझै टिकट काट्न सकिने प्रबन्ध मिलाइएको छ ।

तस्विरहरु : दिपितराज, नेपा-लय