प्रचण्डलाई योगेशको प्रश्न- कुन कानून र अधिकार प्रयोग गरेर विद्युतको १६ अर्ब बक्यौता छुट दिनुभयो ? (भिडिओ)

काठमाडौं । नेकपा एमालेका सचिव योगेश भट्टराईले विद्युतको १६ अर्ब छुट दिएको आरोपमा प्रतिनिधिसभाले तत्कालीन प्रधानमन्त्री पुष्पकमल दाहाल ‘प्रचण्ड’ लाई स्पष्टीकरण सोध्नुपर्ने बताएका छन् । प्रतिनिधिसभाको बैठकमा बोल्दै कुन कानून र अधिकारको प्रयोग गरेर विद्युत बक्यौता छुट दिनुभयो ? भन्दै प्रश्न गरे ।

उनले भने, ‘२१ अर्ब ८८ करोड बक्यौता छ । एक पैसा पनि बाँकी नराखी उठाउनुपर्छ भनेर हामीले भनिरहेका छौं । प्रचण्ड प्रधानमन्त्री भएपछि उहाँले हल गर्नको लागि उहाँले गएको वैशाख २७ गते प्राधिकरणलाई बक्यौतालाई ६ अर्बमा झारेर १६ अर्ब मिनाहा गर्ने आशयको पत्र लेख्नुभयो । तपाईंले कुन कानून र अधिकारको प्रयोगले १६ अर्ब छुट दिने निर्णय गराउनुभयो ?’

उनले विद्युत्को सबै बक्यौता कानून अनुसार उठाउनुपर्ने एमालेको मत रहेको सुनाए ।

उनले भने, ‘हामीले कुनै नयाँ निर्णय गरौं, कसैलाई कारबाही गरौं भनेको छैन । हामीले तत्कालीन मिनेन्द्र रिजाल नेतृत्वको उपसमितिले दिएको प्रतिवेदनको निष्कर्ष र त्यस आधारमा सार्वजनिक लेखा समितिले गरेको निर्णयलाई कार्यान्वयन गरौं भनेको हो । त्यसमा विद्युत बक्यौताको सबै पैसा उठाउनुपर्छ र त्यही अनुसारको निर्देशन प्राधिकरणलाई दिने भनिएको छ ।’