अल्फा क्यापिटल लिमिटेडले आईपीओ जारी गर्ने

काठमाडौं । अल्फा क्यापिटल लिमिटेडले आईपीओ जारी गर्ने भएको छ । आईपीओ निष्कासन प्रक्रिया अघि बढाउनका लागि कम्पनीले एनएमबी क्यापिटललाई बिक्री प्रबन्धक नियुक्त गरेको छ ।

उक्त सम्झौता पत्रमा अल्फा क्यापिटल लिमिटेडका प्रबन्ध निर्देशक अजय कुमार श्रेष्ठ र एनएमबि क्यापिटल लिमिटेडका प्रमुख कार्यकारी अधिकृत दीपेश कुमार वैद्यले बुधबार एक कार्यक्रमबीच हस्ताक्षर गरेका छन् ।

यसैक्रममा, अल्फा क्यापिटल लिमिटेडका प्रबन्ध निर्देशक श्रेष्ठले भने, ‘अल्फा क्यापिटलले आईपीओ जारी गर्ने तयारी गरेको छ । आईपीओ निष्कासनका लागि एनएमबी क्यापिटललाई बिक्री प्रबन्धक नियुक्त गरेका छौं । यो हाम्रो लागि खुशीको कुरा हो ।’

यस्तै, एनएमबी क्यापिटलका प्रमुख कार्यकारी अधिकृत दीपेश कुमार वैद्यले सहज र सफल तरिकाले अल्फा क्यापिटलको आईपीओ निष्कासन प्रक्रिया अघि बढ्ने विश्वास व्यक्त गरे । ‘यो आईपीओ निष्कासन प्रक्रियामा एनएमबी क्यापिटलले सहज र व्यावसायिक ढंगले भूमिका निर्वाह गर्नेछ,’ उनले भने ।

अल्फा क्यापिटल सफल व्यावसायिक तथा उच्च वृद्धि सम्भावना भएको एक लगानी (इन्भेष्टमेन्ट) कम्पनी हो । यसले विभिन्न क्षेत्रका कम्पनीहरुमा लगानी गर्दै आएको छ । आईपीओ जारी गरेर पूंजी बजारमा सूचीकृत भएपछि कम्पनीको दायरा, क्षेत्र र जिम्मेवारी अझै विस्तार हुने विश्वास लिइएको छ ।