‘सतिदेवी’ हेरेर निस्केकी महिला रुँदारुँदै बेहोस भएर ढलेपछि…

काठमाडौं । चलचित्र हेरेर दर्शक हलबाट दर्शक रुँदै निस्केको दृश्य नौलो होइन । तर, रुँदा रुँदा दर्शक बेहोस भएको चाहिँ सायद तपाईँले देख्नु र सुन्नुभएको थिएन होला ।

दुई दिनअघि काठमाडौंको विश्व ज्योति हलमा यस्तै अपत्यारिलो दृश्य देखियो । चलचित्र ‘सतिदेवी हेरेर रुँदै हलबाट निस्केकी दर्शक बेहोस भएर भुईँमा लडिन् । उनलाई पानी छम्किनु परेको थियो । यो दृश्य क्यामरामा कैद नभएको भए सायद पत्याउनै कठिन हुन्थ्यो ।

चलचित्रका निर्देशक लक्ष्मण सुवेदी तथा केही कलाकारहरू पनि हल भिजिटका लागि पुगेका थिए । युट्युबका क्यामराहरू पनि थिए । सार्वजनिक भएको भिडिओमा चलचित्र सकिएपछि धेरै दर्शकहरू सुँक्क सुँक्क गरिरहेको देखिन्छ । एक महिला भने पुरै भावविह्वल बन्छिन् । ठूलो शोकमा परेको भावमा हलबाट बलिन्द्रधारा आँशु खसाल्दै बाहिरिन्छन् ।

हलबाहिर चलचित्रका कलाकारहरू देख्छिन् । उनीहरूमध्ये बाल कलाकार हर्षिका वलीतर्फ उनको नजर पुग्छ । हर्षिकालाई गहिरो अनुहारमा बेर्छिन् र धरधरी रुन्छिन् । हर्षिका मुस्काइरहेकी हुन्छिन् । अरू कलाकारहरूको अनुहारमा पनि मुस्कान छाउँछ ।

दर्शक रुँदा चलचित्रका मेकर्स र कलाकार मुस्कुराउनु स्वभाविक हो । आफ्नो चलचित्रले दर्शकलाई भित्रैदेखि छोएको ठानेर उनीहरू आल्हादित बन्ने नै भए । तर, जब ती महिला रुँदारुँदै भक्लक्कै भुईँमा पछारिन्छन्, सबै आत्तिन्छन् । सबैले वरिपरिबाट घेर्छन् । बोतलबाट पानी छम्केर उनलाई होसमा ल्याइन्छ ।

महिला बेहोस बनेपछि आफूहरू किंकर्तव्यविमुढ बनेको निर्देशक सुबेदीले बताए ।

‘सुरुमा त दर्शक रोएको देखेर आनन्द लागिरहेको थियो । तर, अचानक उहाँ ढल्नुभएपछि सबै जना आत्तियौँ । के गर्ने कसो गर्ने भयो,’ उनले भने ।

होस खुलेपछि ती महिलाले आफूलाई चलचित्रको कथाले विक्षिप्त बनाएको बताएकी थिइन् ।

उनले भनिन्, ‘मलाई पुरै चलचित्र हेर्न सक्दिनजस्तो लागेको थियो । जसोतसो हेरेँ । हलबाट निस्किँदा नै भक्कानो फुटिरहेको थिएँ । रुँदारुँदै ढल्न पुगेछु ।’

उनले आफ्नो ब्लड प्रेसर लो भएको पनि बताइन् । ती महिलाको परिचय भने खुलेको छैन ।

टिकट काटेर मनोरञ्जनका लागि आएका दर्शकलाई रुवाउँदै हलबाट निकाल्नु ‘न्याय’ हो वा होइन भन्ने प्रश्न आफ्नो ठाउँमा छ । सर्जकको कोणबाट हेर्दा चाहिँ यो अवश्य सफलता हो । काल्पनिक कथाले मान्छेको आँखामा आँशु ल्याउन चलचित्रमा राम्रै दमखम हुनुपर्छ ।

चलचित्र ‘सतिदेवी’ दुरदराजमा एक ‘छोरी’ ले भोग्नुपरेको पिडा र चित्कारमा उनिएको छ । चलचित्रले दर्शकको अन्तस्करणलाई हल्लाउने दाबी निर्माण पक्षको छ ।