ममता हत्या आरोपी नरेशले ६ महिना अघि छोडेका थिए अमेरिकी सेनाको जागिर, प्रहरीमा २२ दिन हाजिर

काठमाडौं । नरेश भट्टले श्रीमती ममता काफ्लेलाई हत्या गरेर लाश बेपत्ता बनाएको आरोप छ । उनलाई अमेरिकी प्रहरीले लाश बेपत्ता बनाएको कसुरमा मुद्दा चलाइरहेको छ । सुदूरपश्चिम प्रदेशको कन्चनपुर जिल्लाको बेलडाँडी गाउँपालिकाका स्थानिय भट्ट २०७३ साउनमा अमेरिका उडेका थिए ।

अमेरिका पुगेपछि उनी अमेरिकी सेनामा जागिरे भए । अमेरिकाका रैथानेहरुले सेनाका जागिर गर्न अनिच्छा देखाएसँगै अहिले आप्रवासीहरुलाई धमाधम लिन थालेको छ । त्यही मेसोमा भट्ट पनि अमेरिकी सेनामा प्रवेश गरेका हुन् । एमएसएन डटकमका अनुसार भट्ट सन् २०१७ जुनदेखि २०२४ फेबु्रअरीसम्म अमेरिकी सेनाको आर्मी रिजर्भको अटोमेटेड लजिस्टिक स्पेसिअलिस्ट (नाइन्टी टू ए)को रुपमा कार्यररत थिए ।

झण्डै सात वर्ष अमेरिकी सेनामा काम गरेका उनले सैन्य जागिर छोड्ने कारण भने सार्वजनिकरुपमा खुलेको छैन । भट्टले प्रहरी रिक्रुटको रुपमा पनि काम गरेका थिए । उनले २२ दिनमात्रै अमेरिकाको फेयरफेक्स काउन्टी क्रिमिनल जस्टिस सिस्टमा जोडिएर काम गरेको एमएसएन डटकमले उल्लेख गरेको छ ।

यस्तै अमेरिकी अखबार न्यूजविकले भट्टले लगाएको सैन्य पोसाक र हतियार बोकेको तस्बिर सार्वजनिक गरेको छ । प्रहरी र सेना दुवैको थोरबहुत अनुभव भएका भट्टले अमेरिकी प्रहरीको अनुसन्धानमा सहयोग नगरेको न्यूजविकले उल्लेख गरेको छ ।