राजाको गोली र मन्त्रीको रफ्फू सम्झाउँदै प्रचण्डलाई ठाकुर गैरैले भने- अब झुक्याउने समय सकियो (भिडिओ)

काठमाडौं । नेकपा एमालेका सांसद ठाकुर गैरेले नेकपा माओवादी केन्द्रका अध्यक्ष पुष्पकमल दाहाल प्रचण्डलाई अब झुक्याउने समय सकिएको बताएका छन् । प्रतिनिधि सभाको बैठकमा बोल्दै प्रमुख प्रतिपक्ष दललाई धेर्यता गरेर सही बाटोमा हिँड्न आग्रह गरे ।

राजाको गोली र मन्त्रीको रफ्फू सम्झाउँदै उनले भने, ‘प्रतिपक्ष दलको नेताले अब सदनमा बोल्नुभएको कुरा अब कसैले नपत्याउने, कोही नझुक्किने, त्यो कुरा कसैले विश्वास नगर्ने तहमा पुगेको कुरा अस्तिको मन्तव्यबाट प्रष्ट हुन्छ । मलाई ती राजाको कुरा अहिले झलझली याद आइरहेको छ ।’

एकजना राजाले भारी सभामा झुट बोल्ने र मन्त्रीले सच्याउँदै राजाले भनेपछि सत्य हो भनेर कुतर्क गर्दै जाँदा अन्तिममा मन्त्रीले अब झुक्याउन सकिदैन महाराजा भनेर हार खाएको कथा हाल्दै गैरेले अब माओवादीको झुट कतै नचल्ने बताए । उनले जनयुद्धका नाममा माओवादीले बाँदरमुडे घटनादेखि मुक्तिनाथ अधिकार,बुद्धिमान पाख्रिन गुप्तवहादुर विश्वकर्माजस्ता हजारौं निहत्थाको हत्या गरेकाले त्यो हिंसा र आतंक नै भएको बताए ।