नेपथ्य अमेरिका शृंखला २०२४: न्यूयोर्कमा ऐतिहासिक प्रस्तुति

न्यूयोर्क । हजारौं दर्शकमाझ अन्तिम गीत ‘रातो र चन्द्रसूर्जे’ गाइरहँदा जताततै राष्ट्रिय झण्डा हल्लिरहेको देखेपछि गायक अमृत गुरुङ भावविभोर बन्न पुगे । धुन बज्दाबज्दैको क्षण उनले बीचैमा दुवै हात उचाले र अनुरोध गरे, ‘संसारभर फैलिएर रहेका नेपालीभाषीहरू एक भएर बसौं है !’

प्रत्युत्तरमा टनाटन भरिएको ‘टर्मिनल फाइभ’ हलै थर्कमान हुनेगरी दर्शकले समर्थन जनाए । अमृतको यो आह्वानसँगै अमेरिकाको शृंखलाबद्ध कन्सर्टमध्ये पाँचौं आयोजना पनि न्यूयोर्कमा उत्तिकै भव्यसाथ सम्पन्न भयो ।

विश्वकै केन्द्र मानिने न्यूयोर्क नेपाली लोकरक ब्यान्ड नेपथ्यले अमेरिकामा आफूलाई सबैभन्दा धेरै पटक प्रस्तुत गरेको शहर पनि हो । यस पटक न्यूयोर्कमा नेपथ्य प्रवेश गर्दा उत्साहित नेपालीहरूको टोली परम्परागत पोशाकसहित स्वागत गर्न लागोर्डिया विमानस्थल पुगेका थिए । उनीहरूले साथमा लिएर गएको पञ्चेबाजा टोलीले तयार पारेको धुनसहित ब्यान्डलाई न्यूयोर्क शहरमा भित्र्याइएको थियो ।

नेपथ्यका नयाँ तथा सार्वकालिक हिट गीतहरू प्रस्तुत गरिएको कार्यक्रममा गीतहरूको बीचमा गायक गुरुङले बोलेका सामाजिक तथा सांस्कृतिक टिप्पणीहरूमा समेत दर्शकले उत्तिकै आनन्द मानेका थिए । उनले गीत प्रस्तुति सँगसँगै यसरी दर्शकसँग दोहोरो संवादको क्रम कार्यक्रमको अन्तिमसम्मै जारी राखेका थिए ।

गायक गुरुङले कतिपय गीत आफूले नेपालका जटिल भूभागहरूमा पदयात्राकै क्रममा तयार पारेको र कतिपय उतै संकलन गरेको जानकारी दिएका थिए ।

कन्सर्ट अवधिभर दर्शकहरूले भरिएको सिङ्गो ‘टर्मिनल फाइभ’ हल बत्ती, आवाज र उफ्रिरहेका खचाखच भीडको उत्साहले उचालिएको थियो ।

‘नेपाली भाषा रहुञ्जेल हामी नेपालीहरू रहिरहनेछौं’, अमेरिका बस्दै आएका दर्शकहरूसमक्ष अमृतले आग्रह गरे, ‘संसारमा जतासुकै गएपनि भावी सन्ततिलाई सके आफ्नो मातृभाषासमेत, नत्र नेपाली भाषामार्फत उनीहरूको जरासँग जोडिदिन नछाड्नुस् है ।’

कार्यक्रममा ‘यो जिन्दगानी’ प्रस्तुत हुँदा भावुक भइरहेका दर्शकलाई त्यसपछि भने ‘गाउँ–गाउँबाट उठ’ले जुरुक्कै उचाल्दै ‘रेशम’, ‘तालको पानी’ र ‘रातो र चन्द्रसूर्जे’ जस्ता प्रस्तुतिमार्फत चरमोत्कर्षमा पु¥याएको थियो ।

न्यूयोर्क विश्वविद्यालयको उडहल अस्पतालमा रेसिडेन्ट डाक्टर रहेका समनअर्याल यो ठाउँ आएको दुई वर्ष भयो । उनी पहिलो पटक नेपथ्यको कन्सर्ट अनुभव गरिरहेका थिए ।

‘सबैको समयको कदर गर्दै समयमा सुरु भएको यो कार्यक्रमको प्रत्येक क्षण विशेष रूपमा सिँगारिएको महसुस भयो’, डा. अर्यालले भने, ‘मञ्चका कलाकारसँगै दर्शक दीर्घाले एकसाथ गाइरहेको देख्दा यो त जीवनमै एक पटक लिनैपर्ने रमाइलो अनुभव जस्तो लाग्यो ।’

यो कन्सर्ट हेर्न नेपाली साथीको साथ लागेर बंगलादेश मूलकी २२ वर्षीया विद्यार्थी माया कर्माकर पनि आएकी थिइन् ।

‘संगीतले भाषाको सीमारेखा नाघ्दोरहेछ भन्ने उदाहरण मेरो निम्ति नेपथ्यको आजको प्रस्तुति रह्यो’, मायाले थपिन्, ‘मञ्चबाट आइरहेको शक्तिशाली प्रभाव, तल दर्शकहरूको एकत्रित ऊर्जा, जताततै प्रशंसकहरू गाइरहेका नाचिरहेका, मुख्य गायकका बोलीदेखि हाउभाउसम्म प्रत्येक गतिविधिमा सम्मोहन, पृष्ठभूमिमा बग्दै गरेका नेपालका मनमोहक दृश्यहरूदेखि हलभित्रका चकाचौध बत्तीहरूको प्रयोगले सिंगो परिवेशै गजबको लाग्यो ।’

लोरेन ग्राबीले साउन्ड इन्जिनियरको काम थालेको ३० वर्ष भयो । बितेको १५ वर्षयता भने उनी यसै टर्मिनल फाइभमा कार्यरत छन् । ‘मैले दुनियाँभरका धेरै प्रकारका ब्यान्डहरूको कन्सर्टमा काम गरेको छु ।नेपथ्यसँगको अनुभव भने यो रकब्यान्ड भइकन पनि यसका संगीतमा लुकेका युनिक नोटहरूले गर्दा बेग्लै स्वादको लाग्यो’, लोरेनले भने ।

कन्सर्टमा मुख्य गायक अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।

‘हामीले धेरै कार्यक्रम आयोजना गर्दै आएको भए पनि नेपथ्य चाहिँ विशेष रह्यो’, आयोजक टोलीका थिले थकालीले भने, ‘कन्सर्ट सकिएपछि पनि मलाई असंख्य दर्शकहरूले फोन र मेसेज गर्दै धन्यवाद दिइरहेका छन् ।’

आफूहरूले चाहना र मेहनत गरेबमोजिम नै यसपालाको नेपथ्य कन्सर्ट न्यूयोर्कमा हालसम्म प्रस्तुत नेपाली कार्यक्रममध्ये ऐतिहासिक बन्न पुगेको उनको प्रतिक्रिया थियो ।

३५ वर्षदेखि न्यूयोर्क बस्दै आएका अनिल शाहीले आफ्नो फेसबुकमा साथीहरूसँग नाच्दै गरेको भिडियो पोस्ट गर्दै लेखेका छन्, ‘नेपथ्यमय भएसि बुढेसकालाँ नि बैंस यस्तरी उर्लंदोर’च के !’

यसरी अमेरिकाको शृंखलाबद्ध यात्रामा अघिल्ला पाँच कन्सर्ट भव्य रूपमा सम्पन्न भएपछि अब छैटौं प्रस्तुतिका लागि नेपथ्य डीएमभी क्षेत्रको मेरिल्यान्ड पुगिसकेको छ । यहाँस्थित ‘दी हल एट लाइभ’मा सेप्टेम्बर १ तारिखका दिन ब्यान्ड प्रस्तुत हुँदैछ ।

मेरिल्यान्डको आयोजना सम्पन्न भएपछि अन्त्यमा पेन्सिलभानियाको ह्यारिसबर्गमा सातौं कन्सर्टसँगै यस वर्षको डेढ महिना लामो अमेरिका यात्राले विश्राम लिनेछ । अमेरिकाका सबै कन्सर्टमा दर्शकहरूले अनलाइनबाट सोझै टिकट काट्न सकिने प्रबन्ध मिलाइएको छ ।

तस्विरहरु : नेपा-लय